Hmeichhe Euro final-ah England vs Germany

Hmeichhe European Championship final lut turin Germany chuan Nilaini zan khan France 2-1 in an hneh a, final-ah inelna thlengtu England an hmachhawn ang. Nomawi inchuhna hi July 31, Pathianni zan dar 9:30 hian Wembley Stadium-ah khelh tur a ni.

Germany tan Alexandra Popp a che ṭha a, Stadium MK-a inkhelah minute 40-naah goal hmahruai a khung. Minute 44-naah Germany keeper Merle Frohms-i'n an lamah tilut mah se second half-ah Popp bawk a rawn lang a, minute 76-naah chakna goal a khung.

Mipa Euro 2020-ah khan England-in Wembley Stadium-ah Germany an hneh a, amaherawhchu Wembley Stadium-ah tho hian final-ah Italy an hneh lo.

England mipa team hian Euro nomawi an la chawi lo a, hmeichhe team pawh an la champion lo. Germany hmeichhe team erawh inelna vawi 12 neih tawhah vawi riat an champion a, final an khelh tawhah an chak vek a ni.