Zaninah MSL qualifying semifinal

Mizoram Super League season 8 khel tur zawnna chu a hmawr bawk a hnai, zanin hian qualifying khel laia a thiam zual palite chu Hawla Indoor Stadium, Republic Vengthlangah an inel dawn.

Lunglei leh Saitual ten zanin dar 6:00-ah match hmasa zawk an khel dawn, semifinal hnuhnung zawkah Kolasib leh Champhai te an intum leh ang. A chak zawk pahnih nen final an la khel leh dawn, final hi game 1 chauh khelh tur a ni ang.

MSL8-ah hian team pariat an awm dawn, inelna hmasa lamah chuan team paruk an awm ṭhin a, pahniha tih pun tur a ni. Zarkawt BCA, Khatla TBL, Chanmari Vikings, Tuikual South leh Mission Veng Hotshots te an la tling sa.

Chawnpui erawh an tlahniam thung. Division 1 aṭangin Khatla South Barons leh LC Associates Bungkawn te an tling tawh bawk, qualifying-a champion hian hmun ruak pakhat la awm chu an hnawh khat dawn a ni.

MSL qualifying khel tur hian district hrang hrang a duh apiang an tel thei, district pasarih an inlan. Pool pahnihah ṭhenhran an ni a, an awmna pool tur chu pawh chawpsak an ni thung.

Pool A-ah Lunglei, Lawngtlai, Champhai leh Siaha an awm. Pool B lamah Kolasib, Saitual leh Serchhip an awm thung. Pool tina mite an inkhelh kual hnuah a sang pali ten semifinal hi an lut a ni.

Zanin Inkhel tur - Semifinal
Lunglei 6:00PM Saitual
Kolasib 8:00 PM Champhai