Season tawpah Vettel a chawl dawn

Formula 1 world champion vawi li ni tawh Sebastian Vettel chuan tun season tawp ruala a chawlh tur thu a sawi, car intlansiakna sang berah hian intlansiak a hmachhawn apiang hi a tan chuan a hnuhnung ber a ni nghal zel tawh tihna a ni.

Red Bull car a khalh laiin Vettel hian F1 nomawi vawi li ngawt a chawi, hlawhtlinna tam zawk chan duhin Ferrari a zawm. Italian team a zawm hnuah erawh a champion lo, driver tam tak duhthusam car sen chu khalh mah se a duhthusam zawng zawng chu a hlawhtling thei bik lo.

German tlangval hi F1 driver hlawhtling berte zinga mi chu a ni ta tho. Champion hnem lamah vawi sarih champion pahnih Lewis Hamilton leh Michael Schumacher te bakah Juan Manuel Fangio (5) te chauh a chungah an awm.

Kum 35 mi Vettel chuan, "Thutlukna siam tur hian ka inngaihtuah rei hle, season tawpa ka chawlh tur thu sawi hi a harsa pawh ka ti. Ka tan F1 a tawp nghal tihna erawh a la ni lo, season tluanin inelna ka la hmachhawn zel dawn.

"Min ṭan em em ṭhin tute chungah lawmthu ka sawi, anni tel lo chuan tuna ka thlen chin pawh hi thlen theih a ni lo. Ka tan kum hnuhnung ber a ni ta bawk a, a ṭha thei ang bera hnu khar ka duh, team tan theihtawp ka chhuah zel ang," a ti.

Nomawi chawi hnem lamah record a nei ṭha a, intlansiaka hnehna chan tam lamah pawh a ti ṭha berte zinga mi a ni. F1 huangah vawi 53 a chak a, ani aia chak hnem chu Hamilton leh Schumacher te chauh an ni bawk.

Pathumna chin nih phei chu a ngah hle, dawhsanah (podium) vawi 122 ngawt a lawn kai, vawi khat chauh lawn kai pawh thil awlsam a ni lo, a sulhnu leh thiltihte hi nakin thlenga sawi zui hlawh tur a ni hlawm.

Red Bull a chhuahsan hnuah beisei phak ta chiah lo mah se sawmtu erawh a la nei zel. Tun season hian Aston Martin car a khalh mek a, anni hian season tharah pawh chhawr chhunzawm zel an duh. Mahse, a rualpui ṭhenkhatin inelna an la hmachhawn laiin chawlh a thlang ta zawk.

Tun season intlansiak vawi 12 an neih tawhah chak ni hmel a la hmu lo, point 15 nei tawhin driver championship table-ah 14-na a ni mek. A hnungah driver dang pasarih an la awm.