Liverpool - season tharah eng nge an an dawn?

Jurgen Klopp-a hnuaia Liverpool hmuhnawm ṭhinzia inhrilh nawn a ngai lo a, hmanni lawka Premier League nomawi chawi harsat em em team kha European football-a team hmuhnawm ber pawl an ni tawh.

Mahse, Klopp-a'n Liverpool tluchhe mek a dinthar leh nana player pawimawh tak Sadio Mane chuan Reds hi a chhuahsan a, Mane tel loin Liverpool-in season an hman a ṭul dawn.

Chutihrual chuan Liverpool hian Mane thlak turin Darwin Nunez an nei tawh tih hriat a ṭha a, Portuguese forward hian pre-season ah goal khung a thiam tih a pholan tawh avangin Liverpool fans thla a muang.

Liverpool hian Inrinni zan dar 9:30-ah Communtiy Shield khel turin Manchester City an hmachhawn dawn a, Klopp leh a naute tan season thar atana fiahna hmasa a ni ang.

Mamawh chhanna
Liverpool inkhel en ṭhin chuan an hria ang - Reds hian number 9 player an tih, centre forward pangngai tak nei loin Klopp an neih hnuah hun an hmang a, an harhtharna inṭantir lamah Mohamed Salah, Sadio Mane leh Roberto Firmino an inkawp ṭhin.

Liverpool tan a laia khel Firmino-a'n number 9 angin a khel meuh lo a, midfield leh tlarhma thlunzawmtu niin, Salah leh Mane ten goal khungna chance an neih theih nan a ball thiamna chu a chhawr ṭangkai ṭhin a, Reds-in an chhawr hle.

Mahse, Liverpool tan hei hi thil ṭha ber a ni bik lo - an khingpui tur tam takin tlarhmaah Salah, Mane leh Bobby an inkawp dawn tih hriain, Reds khelh dan tur an zir lawk thei.

Diogo Jota luh hnuah Liverpool tlarhma 'chiangsa' ṭhin kha a chiang ta lo a, Luis Diaz a luh hnuah phei chuan bul ṭan tur rin dik a har lehzual sawt - tunah Nunez an neih belh a, Liverpool khelh dan tur hiat a châkawm.

Beiseina
Liverpool boss Klopp chuan, "Pre-season hma hauh aṭang khan tlarhmaa bul ṭan tur a chiang ṭhin a, tunah chuan a chiang tawh lo. Tlarhmaah tupawh chhawr thei dinhmunah kan ding a, chu chu keinin kan chhawr thiam a ṭul ang," a ti.

Klopp-a'n 4-3-3 formation a hmang ṭhin a, Nunez-a tana hmun siam tura 4-2-3-1 ah a thlak a nih pawhin a mak lo ang. Chuti a nih chuan number 9 player Nunez hi tlarhmaah a awm ang a, a sir aṭangin Salah leh Diaz ten an thlawp thei ang.

Hetah tak hian Nunez hnung chiaha ding turin Firmino a ṭangkai theiin a rinawm a, 4-3-3 a nih laia a hnathawh ṭhin ang thoin midfield leh tlarhma a thlunzawm thei dawn tihna a ni.

Season zawh ruala contract hmang zo tur Firmino hi Juventus chuan an rim nia sawi a awm a, mahse, he thu buatsaih lai hi chuan Liverpool-in hralh tumna an nei lo a, Brazilian forward hian transfer hawn tirh khan cham a duh thu a lo sawi tawh bawk.

Nunez hi
Klopp-a'n tlarhmaah duhthlan tur a ngah a, chutihruala lawmawm lehzual chu Nunez tih loh chu Reds-a nel sa vek an ni - Salah leh Firmino chanchin inhrilh nawn a ngai lo a, Jota leh Diaz lah an tlangnel em em tawh bawk.

Pound maktaduai 85 thlenga a man sang chho thei tur Nunez hian season hmasa khan Benfica tan match 41-ah goal 34 a khung a, mahse, Liverpool-ah a khelh dan avangin chhan a ngai nghal deuh der.

Liverpool hian Nilaini zan khan RB Salzburg chu khualmualah 1-0 in an ngam lo a, Nunez hian first half khel mah se danglamna a thlen lo - RB Leipzig laka goal li a khung avanga an fak striker hi an sel leh der tawh.

Mahse, Klopp chuan, "Nunez khan chance a nei a, goal pawh a khung teuh hle. Mahse, a tirah khan a mamawh kan pe tawk lo a ni," a ti a, a striker chu a khelh chhunga an chawm ṭhat tawk loh avanga goal khung lo mai a nih thu a sawi.

Transfer
Liverpool-in nipuiah Nunez lalut mah se player langsar dang lakluh erawh an la nei lo. Fulham aṭanga Fabio Carvalho lakluh nan pound maktaduai nga an seng a, Portuguese winger beiseiawm hian theihna sang tak nei mah se hmun pawimawh chang nghal tura beisei erawh a harsa.

Kum 18 mi Calvin Ramsay hi Scottish club Aberdeen aṭanga an lakluh a ni a, a kum la nau deuh mah se tawnhriat a nei ṭha - mahse, Trent Alexander-Arnold nena inel tur an nih avangin bul ṭan tura beisei chi a ni lo.

Hetihlai hian Liverpool hian player 10 ngawt chu nipui transfer-ah an chhuahtir thung a, player langsar chhuak zingah Mane bakah Loris Karius, Divock Origi, Takumi Minamino leh Neco Williams te an tel.

A tawi zawnga sawi chuan Liverpool hian season hmasaa an squad ngai deuhthawin season thar an hmachhawn dawn tihna a ni a, Mane aia Nunez awm ta tih loh chu thil danglam langsar a awm lo.

Thlir vel ila
Liverpool-in Klopp an neih hnua an transfer tih fuh ber pawl chu Alisson an lalut hi a ni ang - Brazilian keeper hian season dang ang thoin Reds si ban a nghak leh ang.

Andrew Robertson leh Arnold chu full back-a bul ṭan leh chiang tura ngaih an ni a, Virgil van Dijk-a'n a laiah contract ziak thar Joe Gomez, Joel Matip leh Ibrahima Konaté zinga a tu ber nge a kawp ṭhin ang, tih chu chhan mai a harsa rih.

Midfield-ah captain Jordan Henderson, James Milner, Alex Oxlade-Chamberlain, Fabinho, Naby Keita, Thiago Alcantara, Curtis Jones leh Harvey Elliot an nei a, Elliot hi forward anga chhawr theih an ni bawk.

Klopp-a'n kil tinah player ṭha chhawr tur a nei a, a vanneihna chu a player-te an inhrechiang sa hlawm hi a ni a, player naupang tak tak hmangin hma hun atan team a din tel mek bawk - he team hi an hmuhnawm leh dawn, tih ringhlel suh.