Nadal a training chhunzawm zel

Wimbledon aṭanga a inhnuhdawh hnuah Rafael Nadal hliam a dam chho leh tawh a, ngawrh takin training a nei chhunzawm zel. US Open inbuatsaih nan tournament khelh ngei a tum ruh hle.

Tun thla tir khan Nick Kyrgios nen Wimbledon semifinal khel tur an ni a, mahse a dul hliam vangin Nadal a inlan thei lo.

Grand Slam vawi 22 champion tawh tan semifinal khelh theih loh kha thil uiawm tak a ni ngei ang. Grand Slam champion hnem lama a elpui Novak Djokovic a champion zui, an inkarah nomawi pakhat chiah a awm leh ta.

Rafael Nadal-a academy chuan instagram-ah Nadal-a training lai thlalak an tarlang a, 'hetah hian hna chhunzawm turin a lo kir' tiin an ziak tel bawk. Kar leh lamah chuan match pangngai a khel thei tawh tura beisei a ni.

Ruahman dan chuan Nadal hian Canadian Open a khel ang, hard court inelnaah hian player langsar leh ṭha ho an tel dawn. Novak Djokovic erawhin hripui leng laka invenna a lak ve loh avangin United States a pan thei dawn lo.

Tun hnaia khel ṭha Kyrgios pawh khup hliam vangin a chawl mek ve bawk. Atlanta Open-ah Australian tlangval hi inlan tur a ni a, mahse hun tepter tawh takah a inhnukdawk leh ta zawk a ni.

Tennis season khatah Grand Slam pali an khel ṭhin. Australian Open, French Open leh Wimbledon an khel zo tawh. September thla hian New York khawpuiah US Open an khel dawn, kumin chhung atan major tournament hnuhnung ber a ni ang.