Republic Veng tan Hnahthial

Hnahthial DFA chuan I Day & Division Screening Football Tournament an buatsaih mek a, inelna hi July 25 aṭanga khelh ṭan kha niin August 15-ah final khelh a ni ang. I Day Football inelnaah Hnahthial DFA chuan Republic Vengin khuarel chhiatna an tawh ṭanpui nan bawm an dawh a, Hnahthial District mipuite chu tlemlua awm loa remchan ang pawisa thlak turin an ngen.

Hnahthial DFA chuan, "Hnahthial DFA Team te duat taka min lo thleng ṭhintu, Aizawla Hnahthial DFA inpui kan tih ve hial Republic Vengin khuarel chhiatna nasa tak an tawk a, puih ve ngei ṭul kan ti. DFA lamin sum leh pai ṭhahnem tak kan pe thei lo a, tuna I-Day Tournament kan khelh mekah hian Republic Veng pualin bâwm kan rawn hûng dawn. Hnahthial District mipuiten tlemlua awm loin kan remchan ang pawisa thlak turin kan inngen a, Kan chunga ṭhat chhuahtute hi ṭhatna bawka kan puih a va ṭul tehlul em!," tiin thuchhuah an siam.

Hnahthial hi tun hnaia inelna neih zawh tak All Mizoram Inter Village Football Tournament 2022 leh CYMA Football 2019 a khelh ṭumin Republic Vengah an thleng a, Republic Veng leh Hnahthial inṭhianṭhatna hi football hmanga siam tih theih a ni.

Republic Veng chhiattawhna hi July 23, Inrinni zana thleng a ni a, Lalnunmawia Hnamte chenna in lei khi leh che avanga thleng niin chhungkua 36 (member 146) te chu an riahchhuah a ṭul hial.

Chhungkaw ṭhenkhat chu an chenna inah kir leh tawh mah se chhungkaw engemaw zat an la riak chhuak a, lei dinhmun endik a ngaih avanga in ṭhiah theih a la nih bawk si loh avangin nun phung a la pangngai lo.