Man United defender thar Martinez

Transfer bazar-ah an beisei anga thawm an neih theih loh reng hnuin, Manchester United fan-ten lawmna tur an nei ve leh ta a, Ajax aṭangin defender Lisandro Martinez chu an lalut.

Man United hian Argentina international lalut tur hian pound maktaduai 57 an inseng a, Old Trafford-ah kum nga chhung cham turin contract an ziahpui bawk - a contract a hman zawh chuan kum 2027 thleng Red Devils tan a khel dawn tihna a ni.

Martinez chuan, "He club ropui tak ka zawm thei hi ka lawm takzet a, he hun thleng tur hian ka thawkrim hle - a aia nasa lehzualin ka ṭang ang," a ti a, English football-ah hlawhtlin ngei a tum.

Tawnhriat nei ṭha
Kum 24 mi chauh la ni mah se Martinez hian tawnhriat a nei ṭha a, Argentine tan vawi sarih inlan tawhin, nikuma Copa America champion team zingah khan a tel.

Argentine club ṭha Newell's Old Boys aṭanga a professional career ṭanin, hmun a chan phak loh hnuah Argentine club tho Defensa y Justicia a zawm a, season hnih chhung a khel hman.

May 2019 khan pound maktaduai 6.3-in Ajax hi a zawm a, season thum chhunga match 120 khelin goal ruk a khung a, Eredivisie-ah vawi hnih champion nomawi chawiin, KNVB Cup leh Johan Cruyff Shield-ah a champion pui.

Beiseina
Martinez-a'n naupangtê ni chungin champion nomawi a kawl nual a, United-ah chhunzawm a duh. Argentine centre back chuan, "Team hlawhtling tak taka khelin ka vannei em em a, he ka vanneihna hi United-ah chhawm nun ka duh a ni," a ti.

Season hman zawh taka Ajax player of the year chuan sawi zawmin, "Ka beisei hlawhtlinna chang turin tih tur tam tak a awm ang tih ka chiang a, mahse, manager leh coach, ka teammate tharte nen, kan tih theih ngei ka beisei tlat a ni," a ti a, Old Trafford-ah nomawi chawi a duh.

Red Devils hian Feyenoord aṭangin Dutch full back Tyrell Malacia an lalut tawh a, Christian Eriksen chu free transfer-a lalut tawhin, Lisandro Martinez hi an player lakluh pathumna a ni.

Ten Hag-a nau
Man United manager thar Erik ten Hag-a hnuaiah Martinez a lo khel tawh a, Ajax-a a player hlui hi Old Trafford-ah a seng lut. Dutch coach chuan, "Mi huaisen a ni a, fans hoin an ngaina ngawtin ka ring.

"Player rilru paukhauh tak a ni a, a tawp thlenga bei ṭhin mi a ni. Khelmual a luh tawh chuan a ṭha zawngin a bei chiam mai ṭhin a, chu chu kan mamawh pawh niin ka hria. Ball a thiam tel a, a ke vei lam a hmang ṭhin," a ti.

United football director John Murtough chuan, "Manchester United zawm a thlang hi kan lawm a, hma a sawn zel beisei chungin hlawhtlin kan tumna kawngah min puih theih ka beisei," tiin a sawi ve bawk.

Engtin zel?
Man United hian Nilaini khan an training-na hmun Carrington-ah entu awm loin National League club Wrexham AFC nen friendly match an khel a, Lisandro Martinez bakah player thar Christian Eriksen te inlanin 4-1 in hnehna an chang.

Danish midfielder Eriksen hian freekick aṭangin goal a khung a, season liam taa hlawhtling taka Nottingham Forest tana loan hmanga feh chhuak James Garner pawh a khel tluan a, rawlthar duhawm Zidane Iqbal pawh hun rei tak a inlan.

Manchester United hian July 30, Inrinni tlai dar 5:15-ah Atletico Madrid nen friendly match an khel ang a, July 31, Pathianniah Rayo Vallecano nen an inkhel chhunzawm leh ang. Ten Hag-a hote hian Premier League match hmasa berah August 7, Pathianni hian Brighton an mikhual dawn.