Captain atana Mings thlaktu McGinn

Aston Villa manager Steven Gerrard chuan season thar atan captain a thlak. Villa captain armband lo hreng tawh ṭhintu Tyrone Mings aiah John McGinn chu mawhphurhna pek a ni a, boruak ṭha lo vanga captain dinhmun hi thlak a ni lem lo niin an sawi.

Jack Grealish a chhuah aṭangin Mings hi a captain ṭan, nikum August thla aṭangin Aston Villa captain a ni tihna a ni. Tuna an captain thar tur Scotland midfielder McGinn hian 2018 khan Villa hi a zawm a, khelmual chhungah hruaitu ṭha a ni ṭhin.

Kum 29 mi Mings chuan, "John a ni emaw, kei ka ni emaw buaina ka nei lo. A pawimawh zawk chu Aston Villa hi a ni, he team hruaitu nih hi a nuamin mawhphurhna sang tak a ni, team chhunga mite hian John-a'n chu hna chu a tlinzia kan hria, a captain-na hnuaia khelh ka châk tawh," tiin a sawi.

England international defender hian, captain mawhphurhna a neih tak lohah chuan inkhelah nasa lehzual zawka rilru a pek theih a beisei thu a sawi bawk. Lungawi loh vanga club dang zawn tum ang chi chu a nih hmel loh.

Villa manager Gerrard chuan, "A tirah ṭha takin Tyrone Mings ka titi pui a, ka thutlukna siam tur hi kan sawi dun hmasa thlap. Tyrone hian khelmual chhung leh pawna captain mawhphurhna la turin a hna a tlin tawk tih chu ka hria.

"Mahse ka duh dan chuan a theihna ang tak lan chhuah tir leh zual tur chuan thil dang ngaihtuah tel ngai loin a inkhelh a ngai, tunah chuan a hma aiin a ṭangkai lehzual zawk tawh ngei ang," tiin a sawi.

Goalkeeper Emiliano Martínez chu vice captain atan ruat a ni bawk a, captain armband hreng thei tur zingah Asgkey Young pawh a tel. Young hi chu a kum a tam deuh tawh a, khelmual chhungah a lut tam tawh lo thung ang.