East Bengal enkawl tur Constantine

Indian national coach hlui Stephen Constantine chuan East Bengal a enkawl dawn. Indian Super League club hian 2022-23 season atana an lakluh thu hi an puang chiang tawh a, a hlawh tur zat erawh chiang taka tarlan a ni lo thung.

Constantine hian India team hi vawi hnih a lo enkawl tawh, a vawi khat nan 2002-2005 khan a kaihruai a, a hnuah 2015-2019 chhung a enkawl leh bawk. Indian football kalphung leh player hrechiangtu zinga mi a ni.

East Bengal thawhpui Emami Group chuan club tih hmasawn tumin hma an la mek zel a, coach bakah player pawh an lalut chhunzawm dawn niin an sawi. Ruahman dan chuan Constantine hian September thla aṭangin a team thar hi a enkawl ang.

August 16 aṭangin East Bengal hian Durand Cup an khel dawn, hei bakah hian Calcutta Football League khelh tur an nei bawk. Heng inelna pahnihah hi chuan Bino George-a'n a la enkawl rih dawn - ISL-ah chuan George hi assistant coach a ni thung dawn a ni.

Kum 59 mi Constantine chuan, "Ka lawmin ka phur takzet, he hna duhawm tak thawh hlan ka nghakhlel hle," tiin East Bengal enkawl a chak tawh thu a sawi a, a hna thar turah hian hlawhtlin theih ngei a inbeisei.