Palace defender thar Chris Richards

Crystal Palace chuan Chris Richards an lalut fel. Bayern Munich defender thar manah hian pound maktaduai 8.5 an hmang a, kum nga chhung cham turin inremna hi an ziah pui a ni.

Kum 22 mi hian season hmasa khan Bayern tan a khel phak lo, intuaihriam turin Bundesliga club Hoffenheim a zawm. Bavarians hian Matthijs de Ligt an neih belh leh tak avangin atan khelh phakna tur hmun zawn a ngai.

United States international Richards chuan, "Sulhnu nei ṭha tak Crystal Palace ka zawm thei hi ka lawm. Naupan lai aṭangin Premier League ka en ṭhin, TV lama a inkhel ka hmuh ṭhin Wilfred Zaha te nen kan khelho tur hi ka lawm.

"Palace hian player naupang ṭha tak tak an ngah, chung mite nena khelhna hmun kan inchuh tur hi a nuam dawn a, a phurawm takzet bawk," tiin a club thar tana khelh a chak tawh thu a sawi.

Eagles boss Patrick Vieira-a'n tun nipui bazar chhungin player pali a lei ta. Richards hma hian Sam Johnstone, Malcolm Ebiowei leh Cheick Doucoure te a lo lalut tawh bawk.