Hnehna chan tumin Mercedes ka pan - George Russell

George Russell chuan tun hnai khan Mercedes a pan chhan a sawi a, vawi sarih champion tawh Lewis Hamilton hnunga tlan reng tur a nih bik loh thu a sawi, hnehna chan duh vanga team thar nei a nih thu a sawi bawk.

Tun season kal laiah intlansiak vawi 12 an nei tawh, heng zinga vawi sarih zetah chuan Russell hi a teammate Hamilton hmaah a thleng. Championship table-ah pawh Lewis aiin point 16 zetin a sang zawk mek a ni.

Mercedes driver chuam leh duatlai chu Hamilton a ni a, duhsakna leh hamṭhatna pawh pek bik a ni. Mahse, beisei angin season a hmang lo, a vawi riat nana champion a tumna chu a thamral mek - driver ṭha lo zawka ngaih Russell pawh a tluk rih lo.

Russell chuan, "F1 driver ropui berte zinga mi nen Mercedes car kan khalh dun a ni a, miten kan laka beiseina an nei sang pawh hi a mak hran lo. Season bul kan ṭan dan erawh duhthusam a ni lo thung.

"Kan beisei angin bul kan ṭan lo pawh a ni mai thei, season a la tawp lo tih erawh kan hriat tel a ngai. Keimah bikah chuan ka tlan ṭha pangngai viauin ka hria, chutih rualin a ṭha berte zinga mi el tur chuan hmasawn ka la ngai," a ti.

Kum 24 mi Russell hi driver championship table-ah pangana a ni mek, a chungah hian Red Bull leh Ferrari driver pahnih ve ve an awm. Car intlansiakna sang berah hian hnehna la chang chiah lo mah se, pathumna chinah vawi nga chu a thleng ve tawh.

Britain tlangval Russell chuan, "Mercedes ka pan chhan hi hnehna chan ka duh vang a ni a, ka theihna tak pho chhuak thei tur team nia ka hriat vang a ni bawk. Chuvangin ka elpuite chu tu pawh ni se, hnehna changtu nih tumin inelna ka hmachhawn zel dawn," a ti.

July 31, Pathianni zanah Hungarian Grand Prix an tlan leh ang.