NBA champion Golden State Warriors

Golden State Warriors chuan nimin zing khan Cleveland Cavaliers 129-120 a hnehin NBA champion nomawi an chawi. Warriors hian NBA title vawi nga an lakna niin tun hnai kum thum chhunga a vawi hnihna a ni bawk.

Golden State hian series 4-1 in an la a, kumin playoff-ah hian match 17 an khelh zingah ṭum 16 zet hnehna changin NBA playoff result nei ṭha ber record an siam. Final inkhel panga an hmachhawna point 30 chuang score thei ziah Kevin Du­rant chu 2017 NBA Finals Most Valuable Player atan thlan a ni.

Team hmuhnawm dintu Warriors coach Steve Kerr chuan, "Ka naute inpekna a sang­in midang puih duhna an nei lian a, kan chakna bul chu inpumpekna leh mahni hmasial lohna a ni," a ti. Kerr kaihhruaina hnuaiah GSW hian seaon hmasa khan regular season-a chak hnem ber record an siam tawh bawk.

Warriors an hriam
Oracle Arena, Oakland-ah Game 5 khelh niin Durant chuan point 39 score-in guard Stephen Curry-a'n point 34 a nei bawk a, Andre Iguodala-a'n playoff a khelh tawha point a score hnem ber ṭum tawngin point 20 a nei ve bawk.

Golden State hian season hmasa khan Cleveland lakah 3-1 a an hmahruaina an humhim zo lo, kuminah pawh 3-0 in hmahruai mah se Game 4-a an chak loh avangin fimkur takin champion lai LeBron James-a leh Cavs hi an lo mikhual.

Cavaliers lamin quarter hmasa berah point lia hmu hnem zawkin beiseina an nei sang. Mahse, quarter hnihna tawp lamah GSW hian a zawnin point 15 zet an thun! Point 10 chuanga Cavs an lehthal theih nan hian Curry-a'n three points vawi hnih a neih bakah Durant chuan ṭum three points khat a nei bawk - hnufual lai nei loin a tawp thlengin an chungnung zui ta a ni.

Season hmasa Finals MVP James-a'n point 41 a neih bakah rebound vawi 13 a la. Inkhel hnuhnung zawka hnehna an chan theih nana player langsar Kyrie Irving chuan point 26 nei ve bawk mah se an nomawi humhim nan a tawk zo lo.

MVP Durant
Kum 28-a upa Durant-a'n nikum nipui lai khan Oklahoma City Thunder chhuahsanin Golden State a zawm, nomawi duha tuihal forward hian a tisual lo chiang hle.

US tana Olympic gold medal vawi hnih dawng tawh Durant hian chawhrualin Finals bikah hian match tin point 35.2 a score ziah ang a ni a, Game 5-ah hian point 39 a neih bakah rebound vawi sarih a lak bakah assist vawi nga nei bawkin player ṭangkai leh langsar a ni.

American star Durant chuan, "Zan hnih chhung chu ka mu thei lo tawh. Ka helhhawlh a, beiseina ka neih rualin ka hlauthawng tel bawk. Inkhel pawimawhah rilru fim taka kan inlan theih avangin hnehna kan chang," tiin a sawi.

Ngaihnawm
GSW hi a tirah chuan Phila­delphia Warriors tih niin kum 1946 khan din a ni. Club din a nih kum hian Basketball Asso­ciation of America (BAA) chu khelh ṭan niin an champion nghal a, he inelna BBA hi kum thum neih a nih hnuah National Bas­ketball Association tia thlak a ni.

Kum 1971 khan Warriors hi San Francisco Bay aṭangin Oakland-ah an insawn a, he mi hnu hi chuan an club hmingah Golden State Warriors tih zui a ni; NBA-ah hian - 2017, 2015, 1975, 1956 leh 1947-ah te hlawh­­tlinna an chang.

Kumin NBA en man hi a to hle. Season ticket la lawk te chuan Finals Game 5 ticket bik hi an hralh chhawng leh a, court sir dinglam leh veilam ṭhutna ṭhenkhat chu $133,000 (Rs 85,67,261) zeta hralh niin basket awmna hnung lam pawh $90,000 (Rs 58,00,050) leh $82,000 (Rs 52,82,071) tein an hralh!