Goal 7 luhnaah College Veng vannei

CYMA leh MFA ṭangkawpin an buatsaih TṬ Royte Trophy-ah Col­lege Vengin Chaltlang 4-3 a hnehin semifinal an lut. Semi final-ah Chanmari Veng an hma­chhawn ang.

Comeback ropui

Nimin inkhel hmuhnawm takah Chaltlang tan Bawngkawn laka goal hnih khungtu PC Lalhriatpuia bawk a langsar. Season liam taa Aizawl FC Academy tana goal khung tam ber striker Hriatpuia hian minute 25 chhungin goal hnih a khung a, ding lam aṭanga Lalawmpuia siam sak ve ve a ni.

College Veng beiseina siam turin KC Lalruatkima'n minute 30-naah goal khat a khung a, Chaltlang keeper-in a tih tur a ti lo. Amaherawhchu minute thum hnuah Chaltlang wing back Lalramhmunmawia cross chu Bengaluru FC midfielder Mal­sawm­zuala'n a tauh lut a, 3-1 a ni.

Minute 35-naah KC-a te unaua a upa zawk Dinthar FC midfielder hlui KC Lalchhuanmawia'n yard 25 aṭangin freekick mawi zetin a khung a, College Veng lawmna thlentu chu KC-a ke vei lam a ni.

Second half-ah College Veng tan danglamna thlen thei R. Laldanmawia a rawn inlar ta - I League-a che ṭha tak Aizawl FC winger hian minute 71-naah B. Zoramthara penalty hlawhchhuah chu goal-ah a chantir hnuin minute 81-naah chakna goal a khung zui leh bawk.

Lawm leh lawm lo

College Veng coach H. Vanlal­thlanga chuan, "First half-ah traffic jam vanga kan thlen tlai kan tuar a, kan khelin awmzia a nei lo. Second half-ah thusawi an zawm a, hnehna kan chang. Kan vanneih ni chu ni se goal tam zawk khung thei tur ka ni," tiin hnehna an chan avanga a lawm thu a sawi.

Chaltlang coach Nicky Malsawm­tluanga chuan, "Hming nei a nih avang­in referee-in a tih tur a ti lo a ni. Freekick an hmuhna a nem lutuk a, penalty an hmuh chhan hriatthiam a har a, offside hmangin chakna goal an khung," tiin a lungawi loh thu Vanglaini a hrilh.

Inkhel Result
College Veng 4 - 3 Chaltlang
COL : KC Lalruatkima 30'; KC Lalchhuanmawia 35';
R. Laldanmawia 71', 81'
CHA : PC Lalhriatpuia 19', 25'; Malsawmzuala 33'