Pound maktaduai 30 man Pickford

Everton chuan pound maktaduai 30-a keeper Jordan Pickford lalut turin Sunderland chu inremna an neihpui. Kum 23-a upa keeper hi European Championship khel tur England U21 team squad-ah a awm mek avangin mimal thilah erawh Everton nen inremna an la nei lo. English keeper hi kum 23 tling tawh mah se qualifier khelh a nih laiin kum 21 a la pelh loh avangin Euro U21 inelnaah hian a tel thei a ni.

Pickford hian season hman zawh takah khan Sunderland tan league match 29-a khel a, match tinah 4.7 ang zel save neiin Premier League keeper zingah ania save nei hnem an awm lo - hetichung hian a club erawh Premier League-ah a inhamtanpui zo chuang lo. Kum 2010 khan Black Cats academy a zawm a, January 2016-a senior team tana a match hmasa ber a khelh hmain Darlington, Alfreton Town, Burton Albion, Carlisle United, Bradford City leh Preston-ah te loan-in a khel kual tawh.

Report ṭhenkhata a lan dan chuan Pickford man zat tur pound maktaduai 30 tihah hian a khelh ṭhat dan a zira la pek leh turte a awm a, pound maktaduai 30 hi Merseyside club hian an seng a nih chuan Gianluigi Buffon leh Manchester City keeper thar Ederson dawtah Pickford hi khawvela keeper manto pathumna a ni dawn tihna a ni.