Bengaluru-in ISL an khel dawn ta

I League-a vawi hnih champion tawh Bengaluru FC chuan season thar aṭangin Indian Super League an khel dawn ta.

Thawhṭanni zan khan ISL chuan season thara he inelnaa tel thar tur team pahnih an puang a, Bengaluru FC leh Jamshedpur-a innghat tur TATA enkawl club chu season tharah ISL-ah an inlan dawn.

Indian Super League en­kawltu Football Sports Deve­lop­ment Limited chuan May 12 khan ISL khel duh tan khawpui 10 Ahmedabad, Bengaluru, Cuttack, Durgapur, Hyderabad, Jamshedpur, Kol­kata, Ranchi, Siliguri leh Thiru­vananthapuram aṭangin dilna a hawng a, May 25 ral hmaa dilna chu thehlut tura tih an ni.

Tata Group leh Bengaluru FC bakah tlai khawhnuah East Bengal leh Mohun Bagan-ten ISL khel tura lakchhuah ngai lehkha pawimawh an la chhuak a, dilna thehlut tak erawh Tata Group leh Bengaluru chiah an ni - FSDL-in uluk taka a zirchian hnuah anni pahnih dilna hi a pawm a, season tharah chuan ISL-in team 10 a nei dawn ta.

Team thar an phur

Season tharah Tata enkawl team-in ISL an khel dawn a, pawisa an ngah dawn tih a chiang - Tata Group hausakna hi dollar tluklehdingawn 103.51 a ni. Tata Steel Corporate Services vice president leh Tata Football Academy chairman ni bawk Sunil Bhaskaran chuan, "Tata Steel tan chuan vawiin hi hun hriatreng tlak a ni. India rama infiamna, a bik takin football-in hma a sawn theih nan hian theihtawp kan lo chhuah tawh ṭhin a, kan innghahna khawpui Jamshedpur aṭanga he inelna kan hmachhawn thei tur hi kan lawm takzet a ni," a ti.

Bengaluru FC CEO Parth Jindal chuan, "ISL club zinga tel tura kan dilna pawm a ni hi kan lawm takzet a ni. He dilna thehlut tur hian ngaihtuahna nasa takin kan seng a, Indian football hma hun zel thlirin ISL khelh hi kan thlang ta a ni," tiin I League an chhuahsan chhan a sawi a, ISL-ah hma hun a eng zawk niah a ngai.

Bengaluru hi JSW Group-in an enkawl a, he company hausak zawng hi dollar tluklehdingawn kua lai a ni. ISL-ah sum an seng hnem a nih pawhin a mak lo ang.

Inel tur

Bengaluru leh Tata Group hma hian ISL-in team pariat a nei sa a, Atlético de Kolkata, Benga­luru FC, Chennaiyin FC, Delhi Dynamos, FC Goa, Kerala Blasters, Mumbai City, NorthEast United leh Pune City te an inel ṭhin. Club pahnihin an belh tak avangin team 10 an inel tawh dawn tihna a ni.

Thla thum chhung chauh neih ṭhin inelna hi thla nga chhung atan tihsei a ni nghal bawk. I League lamah Bengaluru hmunruak hi AIFF lamin engtin nge a hnawhkhah dawn a la hriat loh. Aizawl FC ang thoin tun season-a relegate Mumbai FC hi an ngaidam leh a nih pawhin a mak lo ang.

Tuna ruahmanna ang chuan Indian football season hi November-ah ṭan tur a ni tawh dawn a, I League leh ISL hi a ruala khelin player inkalpawh hi a thei tawh dawn lo.

League pahnih inkhel kuala a sang pali hi season tawpah playoff khelin an intum leh ang. Playoff-a pakhatna hi India rama league champion an ni dawn a, champion hian AFC Champions League preliminary round an khel ang a, an inpetkai zo lo a nih chuan AFC Cup group stage aṭangin an khel nghal ang.

Pahnihna hian AFC Cup playoff an khel thung ang a, an inpetkai thei a nih chuan Asia club inelnaah India aiawh pahnih an awm dawn tihna a ni.

Player draft?

Indian Super League-in season hmasa bera an tih dan angin player an draft leh dawn nia sawi a ni. Player-te chu lei theih turin pho chhuah an ni ang a, player lei an nih theihna chin bituk a ni bawk ang. A chhang huai berin player an chang mai zel dawn a ni.

Entir nan Sunil Chhetri man zat chhan ṭan theihna zat chu nuai 80 lo ni ta se, a chhang huai berin vaibelchhe khata a chhan chuan a chhangtu khan India captain hi an chang ang.

He ruahmanna hi kalpui a nih dawn chuan a buai hmasa ber tur chu I League aṭanga ISL khel tur Bengaluru FC hi an ni.

Player langsar tak tak Sunil Chhetri, midfielder Eugeneson Lyngdoh, forward CK Vineeth, defender Sandesh Jhingan leh goalkeeper Amrinder Singh-te an kawl a, ISL draft neih a nih dawn chuan an release vek an ngai dawn tihna a ni.

Bengaluru hian tun dinhmunah player 11 contract nei lai an nei a, anni hi AIFF-in chelh mai an phalsak dawn nge dawn lo a la hriat loh. ISL club ho chu ruahmanna thar kalpui tum a nih avang hian nikum khan player an lak tharte chu kum khat bak contract ziahpui lo turin hrilh hriat an lo ni tawh.

Mizo tan a ṭha!

Indian football kalphung hi buai viauin lang mah se league pahnih awm tur hi Mizo footballer tan chuan a ṭhat hmel hle.

India rama club inelna league sang pahnih a awm tawh dawn tihna a ni a; ISL lamah Indian player paruk talin starting eleven an chang tawh tur a ni tih a nih bawk avangin season dang zawng aiin Indian player an hlu dawn. ISL leh I League-ah player a inkalpawh theih tawh dawn si lo a, club 20 talin player an mamawh dawn tihna a ni.

Tun hnaia football hmanga India rama hriat hlawh mek Mizo footballer-te tan kawng a inhawng zau sawt dawn tihna a ni. Tun season I League-ah khan Mizoram aṭangin player 50 chuang an inlan a, Aizawl FC player 23 chhiar tel loh pawhin Mizo 30 vel chu I League-ah an la awm tho. ISL club 10-in player an mamawh dawn bawk avangin season tharah Mizo tlangval-ten ram pawn club tan an khel nual a nih pawhin a mak lo ang.