Ramhlun leh Hunthar inlan zan

Zanin dar 8:00 hian Hunthar Veng leh Ram­hlun Sporting Club ten R. Dengṭhuama Indoor Stadium, Mualpuiah GIG Motors Pro Volleyball League final hmunruak pakhat an inchuh dawn.

Veng pahnihte hi league round lamah an in­hmachhawn tawh a, Hunthar hian 25-15, 25-22, 19-25, 25-13 in hnehna an chang, an hneh tawh hnu lakah inrintawkna an nei sang ang - RSC lam hian tournament pakhatah hneh loh ngai laka tlawm nawn an duh dawn bik lo, inkhel a hmuhnawm ang.

Hunthar hian an match hmasa berah set la miah loin Chhinga Veng an hneh lo a, hemi hnuah erawh an chesual nawn tawh lo - match thum an khelhah hnehna an chang vek.

Kerela aṭanga chah luh Santhosh Kodakkal leh Sarang S Lal te pla­yer pawimawh an ni. Chutiahrualin an chakna hnar erawh an tlualchung player-te an ni. KT Pana­sonic Best Mizo Player dawng tura rinkai spiker Lalbiak­muana, Samson VL Chhan­­chhuaha leh Lal­rin­­hlua bakah setter Rem­sangzuala an neih bawk avangin rinkai zawk an ni.

Coach Malsawm­dawngliana Chhangte kaihhruai Ramhlun SC hian Suresh Chandra Khoiwal Vicky leh Hafeel VP te an nei ve bawk a, team pahnih danglamna tur chu tualchhung player-te an ni tih a chiang.

RCS hian final luh an duh a nih chuan setter an thlan fuh a ngai ang. Senior player Richard Lalsangzela leh Hmangaihthanga te an pawimawh dawn tihna a ni. RSC-in Mizo player an kawl zingah match khata point 10 chuang nei thei an la awm lo a, final lut tur chuan zan dang zawng aia an khelh ṭhat a ṭul ngei ang.