FIFA U20 World Cup golden boy Solanke Mi ropuite sulhnu chhui turin...?

England-in kum 1966 World Cup nomawi an chawi hnua a vawi khat nan khawvel huap nomawi lian tham an chawi a, FIFA Under 20 World Cup champion an ni. England-in champion nomawi an chawina kawngah player thawh hlawk tak a awm a, a hming chu Dominic Solanke a ni.

Kum 19 leka upa striker hi Golden Ball chawi­mawina pek a ni a, zawhna awm nghal chu Liver­pool striker thar hian amah beiseitute beiseina a chhanglet thei dawn em? tih hi a ni a, age level World Cup-a best player dinhmun lo luah tawhten beisei an phak vek kher loh avangin he zawhna a lo piang nghal hi a awm lo hran lo.

Player ropui

FIFA U20 World Cup golden ball dawng tawh zingah Diego Maradona, Lionel Messi, Sergio Aguero leh Paul Pogba-te ho an awm tih sawi a nih chuan Solanke hmabak en zia a lang nghal kuarh a, mah se he chawimawina dawng tawh zinga Ismail Matar, Dominic Adiyiah, Henrique Almeida leh Adama Traoré-te erawh i hmelhriat loh an ni lawi si - 'Solanke a la ropui dawn' tia sawi ngawt theih a ni ta hauh lo.

Diego Maradona ropui zia hrilh nawn kan ngai lo a, Lionel Messi inkhel lai kan hmu thei hi 'vannei' inti mai tur kan ni. Premier League ngainatu tan Sergio Aguero hming inzawh nawn a ngai lo a, United-in pound maktaduai 89 chuang an phawrh chhuah ngamna Pogba hi sawi nep tum ṭhin mah se Europa League leh League Cup an champion theihna chhan a ni a, a kum leh theihna san zia ngaihtuahin a la vul dawn chauh tih a chiang bawk.

Aw khawiah nge?

Kum 1977-ah FIFA U20 World Cup neih ṭan a ni a, kum hnih dan zelah a ni. Chumi awmzia chu kum 20 hnuai lam inelna World Cup hi vawi 21 neih a ni tawh tihna a ni a, player ṭha ber thlan nan Golden Ball sem a ni ṭhin. Hming 21 zingah sawi tawh angin khawvel huapa 'player ṭha ber a ni' tih ngam hial khawpa ropuite pawh an awm a, mah se beisei phak chhunzawm ta lo hi a tam zawk an ni - Solanke tan hawi 'san' ringawt a la hun lo tihna a ni.

Kum 2000 hnu lama he chawimawina dawng zingah Javier Saviola-te pawh a theihna angin a khel chhuak lo nia sawi ni mah se Barcelona tan season thum chhung ṭha taka a khelh hman tho avangin kum 2000 hnu lama 'beisei phak lo' tia kan sawi tur Matar leh Adiyiah te huang chhunga dah chi erawh a ni lo - Argentina tan vawi 39 inlanin goal 11 a khung hman tlat.

Beisei phak lo

Kum 2003-ah United Arab Emirates-in U20 World Cup an thleng a, a thlengtu team hian quarterfinal hial thlengin an forward pawimawh Ismail Matar chu best player-ah thlan a ni. Ram tan captain armband hreng zuiin match 116 hial inlan zui mah se European club erawh zawm a nei lo a, Arab football-ah player ṭha pawl la ni reng mah se a hunlaia Chelsea leh Inter Milan-in an rim player hian khawvel ngaihven a hlawh zui lo.

Egypt 2009-a best player Dominic Adiyiah beisei phak lohzia sawi dan awlsam ber chu tunah kum 27 leka upa nichungin Thai League T1 club Nakhon Ratchasima tan a khel tih hi a ni a, Ghana tana a inlan hnuhnung ber lah 2012 daih kha a ni tawh.

Kan dem lo che!

Brazilian player zingah golden ball dawng tawh paruk lai an awm a, beisei an phak lo chhunzawm tlangpui bawk. Henrique Almeida tih hming hi i hre lo a nih pawhin kan dem lo che - Brazilian player zinga U20 best player hnuhnung ber hian 2011 khan he chawimawina hi a dawng a, senior team tan vawi khat pawh la inlan loin Brazilian Serie A lamah a hun a hmang mek.

Solanke hmaa chawimawina dawng hnuhnung ber chu Adama Traore a ni a, Mali midfielder hi kum 21 chauha upa a la nih avangin beisei phak lo tia thaibo tur chuan a la hma mah mah mai thei - Monaco midfielder hian loan-in Portuguese club Rio Ave tan a khel mek a, Mali tan match thumah goal khat a khung tawh bawk.

Solanke hmabak

Kum 19-a upa Dominic Solanke-a'n Chelsea-in contract thar an zawrh hnarin Liverpool lam a pan a, kum 24 hnuai lam player a nih avangin Reds hian zângnadawm nan pound maktaduai thum an seng dawn tho. Champions League khel tur Liverpool-in English football-a hmelhriat la hlawh lo striker tan pound maktaduai thum sen an inhuam hi hmanni lawk kha chuan 'a awm tawk viau' anga ngaih ni mah se tunah chuan Merseyside club hian an inseng tlem hle nia ngaih a ni tawh!

Solanke-a'n Under 20 World Cup best player tam zawk sulhnu chhui lo tur chuan Reds-ah khelhna hmun a mamawh dawn a, tun dinhmuna duhthlan tur Daniel Sturridge, Roberto Firmino, Divock Origi leh Danny Ings nei mektu Reds manager Jurgen Klopp-a hmin a ngai dawn. English striker hi a kum la naupan vangin rinrawl a hman chi a ni dawn lo tih chiang reng mah se khelhna hun pek a nih loh chuan 'thamral' mai a hmabak ang.

A tuai lo e

Dominic Solanke-a'n World Cup-ah a hming a chher miau avangin British media-te tan chuan he rawlthar duhawm hi chaw tui ber a ni leh tawh a, chutihrualin a puitlin hmaa rin lutuknain a thlen tur ang a thlen phaktir lo palh ang tih hlauhthawnna a awm bawk.

Mahse, feet 6 leh inch 1-a sang striker hian tun World Cup a chet ṭhat hma daih tawh khan Chelsea Academy Player of the Year (2014-15) leh England Youth Player of the Year (2015) chawimawina a lo dawng tawh a, U20 World Cup-a England a hlawhtlinpui hma hian UEFA European U17 Championship-ah an ram hi a lo hlawhtlinpui tawh a, Chelsea tan FA Youth Cup ( 2013-14, 2014-15) leh UEFA Youth League (2014-15) nomawi a lo chawi tawh a, Dutch league lama Vitesse (2015-16) tan loan-a a khelh laiin match 25-ah goal sarih a khung bawk - Klopp-a'n khelmualah hun tam zawk a pe a nih pawhin a buai lo ang.