Champions Trophy Pakistan-in semifinal an lut
ICC Champions Trophy-a an match hmasa berah India ngam lo mah se Pakistan-in an match hnuhnung pahnihah hnehna an chan avangin semifinal an lut - Shaheens (Pakistan sawina) hian Thawhṭanni tlai khan Sri Lanka chu wicket thumin an hneh a, a thiam pali zingah an invawrhkai.
Ropui taka India an hneh hnu lawkah beiseina sang tak nen Sri Lanka hian Pakistan hmachhawn mah se Indian bowler-te laka an chet dan angin Shaheens bowler lakah an che thei lo a, Junaid Khan (3-40) leh Hasan Ali (3-43) chu Lions (Sri Lanka sawina) batsman-ten an ngam lo.
Beisei phak lo
Sri Lanka-in an match hmasa bera South Africa an ngam loh hnuah India lakah an beiseina an chhi nung a, run 300 chuang target umphain Men in Blues (India sawina) lakah ropui takin hnehna an chang. Pakistan lakah pawh Lanka-in beiseina sang tak nen an khel a, mah se 15.1 over an khelh thlen meuh chuan wicket thum hloh tawhin run 161 chiah an la tlin.
Lions tan captain Angelo Mathews luh hnuah an khelin awmzia nei hman viau mah se Mathews hi run 39 siama a out hnuah Dhananjaya de Silva chu run khat chiah siamin a out ve leh a, Sri Lanka tana run siam hnem ber Niroshan Dickwella (73 runs) out hnuah phei chuan eng an ang tawh lo. Over 49.2-ah Sri Lanka-in run 236 chiah siamin an out vek.
Shaheens an zam lo
South Africa laka hnehna chang hlim Pakistan tan opener Azhar Ali-a'n run 34 chiah a siam hman tihin out mah se a din pui Fakhar Zaman chuan run 50 rawn vaw chhuakin Pakistan dinhmun a rawn siam ṭha. Mahse, Shaheens tan Babar Azam, Mohammad Hafeez leh Shoaib Malik ten an vaia run an siamin 22 bak a tlin lo tihin an out vek a, Pakistan an hawihai.
Shaheens-in South Africa laka hnehna an chan hnuah holam taka tlawm an duh lo. A naute mangan lai pawhin captain Sarfraz Ahmed a ding nghet tlat a, a tawp thleng dama run 61 siamin hnehna a chanpui. Pakistan hian over 44.5-ah an target umphain wicket sarih an hloh a, hnehna an chang.
Eng nge an sawi?
Pakistan captain Sarfraz Ahmed chuan, "Kan bowler-ten fak an phu a, anmahni vanga hnehna chang kan ni. Junaid leh Amir ten an khel ṭha takzet a, Fakhtar-a khelh dan khan min ti lawm viau bawk," tiin an bowler te vanga hnehna chang an nih thu a sawi a, Sri Lanka captain Angelo Mathews chuan, "Pakistan kha huaisen takin an ṭang tlang a, hnehna chan kha an phu a ni," tiin an khingpui a fak bawk.
Vawiin tlai dar 3:00-ah Pakistan hian semifinal an khel nghal dawn a, a thlengtu England nen an inhmachhawn ang. England hian match thum khelin hnehna an chang vek a, Pakistan tan hna a awlsam dawn lo.