Milan-ah forward Andre Silva

AC Milan chuan season tharah hmasawn an tum zia lantirin player thar an lalut zel. Serie A club hian Porto aṭangin forward Andre Silva chu pound maktaduai 33-in an lalut a, a man hi pound maktaduai hniha la pung leh thei niin kum nga daih contract an ziah pui.

Kum 21-a upa Silva hian 2011 khan Porto youth academy a zawm a, kum 2015 December thla khan senior team tan inlan ṭanin season liam ta khan inelna hrang hrangah match 44 a khelh aṭangin goal 21 a khung.

Portugal tana match riat a khelh aṭanga goal sarih khung thei Silva hma hian Milan hian Mateo Musacchio, Franck Kessie leh Ricardo Rodriguez te an lalut tawh bawk. Chinese sumdawng hausa kuta an luh hnuah an indin thar mek a, tun hma deuha an ropuina ang kha neih let tumin hma an la chho mek a ni.

Milan jersey number 10 ha tur Silva chuan, "Milan ka thlan chhan chu Champions League-a sulhnu an neih ṭhat vang a ni. Min lakluh an duh tih ka hriat khan ka hun ṭha neih kha bawhpelh ka duh lo a ni. Ka hmuh dan chuan league nomawi chawi thei turin kan ṭha dawn a, tha thawhtu pawimawh ka nih theih ve ngei pawh ka beisei," tiin a sawi.

Season thara Europa League khel tur Milan hian player thar pali la tawh mah se bazar chhunzawm zel an la tum - Atalanta defender Andrea Conti leh Lazio forward Balde Keitav te nen sawizawm mek an ni.