World Cup khel turin Iran tling

Asia ram aṭanga 2018 FIFA World Cup khel tura tling hmasa ber chu Iran an ni. Thawhṭanni zan khan Iran hian Uzbekistan chu 2-0 in an hneh a, Group A-ah pakhatna dinhmun luah mekin Russia ram kal theihna ticket an hlawh chhuak.

World Cup khel tur hian inelna thlengtu Russia bakah champion ngun ber Brazil an tling chiang tawh a, ram 32 telna inelnaah hian Iran hi dinhmun sawhnghet thei pathumna an ni.

Tehran-ah lawmna

Iran-in an khawpui Tehran-ah Uzbekistan an mikhual a, Azadi Stadium-a inkhelah team ṭha zawk an ni.

Team Melli-in (Iran sawina) Sardar Azmoun hmangin minute 23-naah hma an hruai a, minute 88-naah Mehdi Taremi-a'n chak nemnghehna goal a khung.

Iran hian World Cup ṭum li an khel tawh a, tun hi vawi ngana tur chiah a nih bakah a zawna an inlan vawi khatna tur a ni. Team Melli coach hi Carlos Queiroz a ni a, Portuguese ma­nager hian kum 2011 aṭangin Iran team hi a enkawl ṭan a ni.

Engtin zel?

Asia khawmualpuiin FIFA World Cup khel turin quota pali a nei a, hei bakah hian playoff hmangin pakhat an la inpetling theih bawk.

Group A-ah team paruk - Iran, South Korea, Uzbekistan, Syria, China leh Qatar te an awm. Iran an tling chiang tawh a, table mawngphaha awm Qatar erawh an vanneih viau a nih pawhin playoff bak an khel thei tawh lo.

Group B-ah Japan, Saudi Ara­­bia, Australia, United Arab Emi­rates, Iraq leh Thailand te awmin tling chiang an la awm lo. Table hnuai lama awm Iraq leh Thailand tan beisei tur a awm tawh lo.

Nimin khan Asian qualifier-ah inkhel pali a awm a, result kan hre hman lo.