Wimbledon nomawi duhtu Nadal

French Open nomawi a chawi hnuah Rafael Nadal chu ATP ranking-ah pahnihna a ni leh ta. Spain tlangval hian July 3 aṭanga khelh ṭan tur Wimbledon Championship-ah title lak zui leh ngei a duh thu a sawi.

Kum 31-a upa Nadal hian Pathianni zan khan Stan Wawrinka hnehin a vawi 10 nan Roland Garros title a la a, Open Era chinah Grand Slam inelna pakhata vawi 10 champion thei hmasa ber a ni.

World number 4 aṭanga number 2 a inhlangkai Nadal chuan, "Kum 2012-a ka khup a hliam hnuah grass court-a inkhelh hi a harsa ta hle. Kun hniam a ngai bikin ball a kal chak a, hmun dang zawng aiin hrisel ṭhat a ngai," a ti.

Grand Slam vawi 15 champion tawh Nadal chuan, "Wimbledon final vawi nga ka khel tawh a, ṭum thum a chak lo zawkah ka ṭang. Kuminah seeded pahnihna ni chungin ka inlan thei dawn a, engkim hi ka kut a innghat a ni. Theih ni se chu French Open champion zawh chiah a champion zui nghal ka duh," tiin a sawi.

Nadal hi nikum khan a ban rek na vangin Wimbledon hi a khel thei lo. Grass court-a result nei ṭha tawk lo anga an sawi Nadal hian kum 2008 leh 2010 khan grass court inelna lianah hian hlawhtlinna a lo chang tawh, he hmuna inkhelh nuamti leh sulhnu nei ṭha tam tak aiin a record hi a ṭha zawk hial.

ATP Ranking Thar
# Player Ram Points
1 Andy Murray UK 9,890
2 Rafael Nadal Spain 7,285
3 Stan Wawrinka Switzerland 6,175
4 Novak Djokovic Serbia 5,805
5 Roger Federer Switzerland 4,945
6 Milos Raonic Canada 4,450
7 Marin Cilic Croatia 4,115
8 Dominic Thiem Austria 3,985
9 Kei Nishikori Japan 3,830
10 Alexander Zverev Germany 3,070