Messi leh Abidal inkar a khi

Barcelona captain Lionel Messi chuan club sporting director Eric Abidal thusawi a chhanglet a, club tana a khelhpui ṭhin defender hlui hi a mawhphurhna la ngam turin a hrilh!

Catalan club tana 2007-13 chhunga lo inkhel tawh Abidal hian Spanish chanchinbu lar Diario Sport-in an kawmnaah player-te a sawisel a, coach hlui Ernesto Valverde hnuaia an thawhrim tawk loh thu a sawi. 

Valverde hi January khan a hna aṭanga ban a ni a, a hmun ruak luah tur hian Real Betis boss hlui Quique Setien chu lakluh a ni. 

Abidal hian, "Player tam tak chuan Valverde hnuaia thawh kha nuam an ti lo a, club chhungah buaina a awm a ni. Coach leh player-te inkar a chhe hran lo a, mahse player hlui ka nihna angin thil engemaw chu a awm tih ka hre thei. 

"Hei hi club hnenah ka thlen vat a, Valverde chungchangah thutlukna kan siam ta a ni," a ti a, Abidal-a'n player ho vanga coach an ban anga a sawi tak hi Messi chuan a hrethiam lo. 

Argentine forward chuan, "Player chungchang i sawi a nih chuan an hming nen i sawi tur a ni a, chuti a nih loh chuan kan zavai hming tichhiain thudik lo i thehdarh mai mai a ni," tiin Abidal a chhanglet.

Ballon d'Or chawimawina vawi ruk dawng thei Messi chuan, "Dik taka sawi chuan hetiang thil tih hi ka duh lo takzet. Mahse, mahni hnathawh mawhphurhna chu kan la ngam tur a ni a, thutlukna kan siamah pawh midang puh a ṭul lo. 

"Khelmuala result ṭha loah player-ten mawh kan phur ngei a, kan pawm thlap. Chutiang chiah chuan kan hotute hian an mawhphurhna an lak ngam ve a ngai a ni," a ti!

Diario Sport nena an inkawmnaah Abidal hian Messi chu contract thar ziahpui tuma an dawr mek thu a sawi bawk a, kum 32 mi ni tawh mah se Messi hian tun season-ah Barca tan match 24 khelin goal 19 a khung leh der tawh!

Barcelona chuan an thiampuipa leh sporting director Abidal inkara khi awm avang hian Nilaini khan emergency meeting an ko a, darkar hnih zet titi hona an nei. 

Kum 40 mi Abidal hi he meeting-ah hian a tel a, Nou Camp-ah a hna a thawh chhunzawm zel dawn. Thil chiang taka lang erawh Messi a 'thu' tih hi a ni a, Messi 'meuh' a lungawi loh avangin emergency meeting neih a ngai!

Hetihlai hian Barcelona winger Ousmane Dembele chu a hliam dam tawh hnua training a zawm chu a inhliam leh a, Spanish chanchinbu lar Marca chuan season tawp thleng a inlan theih loh tur thu an sawi. 

Dembele hi November 27-a Borussia Dortmund nen Champions League match an khelh ṭumin a inhliam a, hemi hnuah hian a inlan leh tawh lo.