Mizoramin FPAI Awards a thleng dawn ; Mizote hnena lawmthu sawi kan duh - FPAI general manager

India rama football players intelkhawm pawl Football Players' Association of India chuan Mizoram Football Asso­ciation nena ṭangkawpin kumtina an sem ṭhin FPAI Awards semna chu Mizoramah an nei dawn a, he hun pual hian exhibition match an khel bawk ang.

FPAI president Renedy Singh chuan, "Mizoram hi India ram football-ah roreltu an ni tawh a, footballer kan neih ṭhat ber berte lo chawr chhuahna hmun niin football an ngaina em em bawk. Hei vang hian Mizoram ngeia he hun hman hi kan duh a ni," tiin Mizorama FPAI Awards sem a nih tur chhan a sawi.

Ruahmanna ang chuan FPAI exhibition match hi July 1-ah khelh tur a ni a, zan lamah awards semnain a zui ang. Mizo player-te leh FPAI XI match khelh hun tur hi MFA lamin an la ngaihtuah leh tura dah a ni.

FPAI bihchianna
India rama football hmanga eizawngte intelkhawm pawl Football Players' Association of India hi August 13, 2006 khan din a ni a, player-te hamṭhatna ngaihtuah tura din a ni. He pawl dinna hian Indian football legend Bhaichung Bhutia a thawh hlawk takzet a, November 18, 2009 khan khawvel huapa player intel­khawm pawl FIFPro chuan Budapest-a an khawmpuiah member ni turin an lawmlut.

FPAI hian kum 2009 aṭang khan FPAI Indian Player of the Year, Foreign Player of the Year, Young Player of the Year, Coach of the Year leh Fans Player of the Year thlanna an nei ṭan a, kuminah pawh heng chawimawina te hi sem chhuah tur a ni. FPAI-ah hian India tana vawi 56 inlan tawh Renedy Singh chu president a ni mek a, Sunil Chhetri, Sbhishek Yadav, Clifford Miranda leh Alviot D'Cunha te chu vice president nilai an ni.

Kan lawm e, Mizoram
India rama footballer in­tel­khawm pawlin khawpui duhthlan tur tam tak nei mah se awards sem nan Mizoram kher an thlang a, FPAI general manager Cyrus Confectioner chuan Mizoram thlan a nih chhan chu 'Mizote hnena lawmthu sawi an duh vang' a nih thu Vanglaini a hrilh.

FPAI general manager chuan, "Mizoram hian tun hnaiah India ram football-ah ro an rel mek a, India rama kan neih ṭhat ber ber S. Malsawmtluanga, Jeje Lalpekhlua leh mi dang dangte pawh Mizoram chhuak an ni. Hei vang hian Mizoram hnenah lawmthu sawi kan duh a, awards sem leh exhibition match khelh hi kan tih ve theih sang ber niin kan hria a ni," a ti.

An kim dawn
Cyrus Confectioner chuan, "India rama top player chin chu he hunah hian an rawn tel vek beisei a ni. Sunil Chhetri, Subrata Paul, Nirmal Chhetri, Gouramangi Singh-te an rawn kal vek dawn a, 'top player' chin chu an kim dawn tih hi ka sawifiah theih dan awlsam ber chu a ni," tiin Vanglaini palai hnenah a sawi a, Mizote tan exhibition match hmuhnawm tak phochhuah an tum.

Vanglaini palaiin Gurpreet Singh Sandhu a tel theih dawn leh dawn loh a zawhna chhang­in FPAI general manager chuan, "Gurpreet hi Norwegian club tana khel a ni a, a club tan match pawimawh a neih chuan kan ti lui thei lo ang. Mahse, ani pawh tun dinhmunah chuan rawn hruai ngei kan tum a, Mizo mipui ten an hmuh theih ka beisei a ni," tiin Indian goalkeeper ṭhangduang chungchang a sawi.

Mipui mamawh FPAI
Cyrus chuan, "Mizorama kan rawn kal hmasak ber tur a ni dawn a, Mizo mipuite ṭawi­awmna kan mamawh dawn a ni. Media lam pawh thawhpuiah ka sawm duh a, thawhhona ṭha tak kan neih phawt chuan kan hun hman tur hi hlawhtling takin kan hmang thei ang tih ka ring tlat," tiin Mizo mipuite a sawm a, an lawmthu sawina chu lo ngaihhlut sak turin 'Vanglaini' kaltlangin a ngen.

FPAI hian Fans Player of the Year chu vote theihin an chhawp chhuak tawh a, Shillong Lajong midfielder Isaac Vanmalsawma leh Aizawl FC defender Zo­hmingliana Ralte chu vote theih zingah telh an ni. Vote thlak duh tan FPAI website http://www.thefpai.net-ah vote theih a ni.

FPAI Fan's Player of the Year Nominees
Isaac Vanmalsawma Shillong Lajong
Zohmingliana Ralte Aizawl FC
Adil Khan Churchill Brothers
Albino Gomes Mumbai City FC / Aizawl FC
Balwant Singh Mohun Bagan AC
CKVineeth Bengaluru FC/Kerala Blasters
Debjit Majumder Mohun Bagan/ Atletico de Kolkata
Jayesh Rane Chennaiyin FC/ Aizawl FC
Pritam Kotal Mohun Bagan AC/ Atletico de Kolkata
Robin Singh FC Goa / East Bengal FC
FPAI Indian Player of the Year lo ni tawh te
Kum Hming Club(s)
2009-10 Sunil Chhetri Dempo
2009-10 Mohammed Rafi Mahindra United
2010-11 Mehtab Hussain East Bengal
2011-12 Syed Rahim Nabi Mohun Bagan
2012-13 Lenny Rodrigues Churchill Brothers
2013-14 Balwant Singh Churchill Brothers
2014-15 Eugeneson Lyngdoh Bengaluru FC
2015-16 Jeje Lalpekhlua Mohun Bagan, Chennaiyin FC