TNT hnehin Chhinga Vengin final lut

Mizorama volleyball inelna sang leh lian ber GIG Motors Pro Volleyball League-ah Chhinga Veng chuan final an lut ta, a vawi khat nana PVL kheltu club hian Thawhlehni zan khan TNT, Muanna Veng chu 3-0 in an sawp.

R. Dengṭhuama In­door Stadium, Mualpuia semifinal hmasa zawkah Chhinga Veng hi kawng tinrengin an chungnung zawk a, league round lama an hneh tawh lakah 25-17, 25-21, 25-18 in an chak nawn.

Chhinga Veng hi kum­i­nah team ṭha ber an ni rih, match nga an khelh tawhah hnehna an chang vek - set hloh la nei loin an khingpui a piang an sawp vek. Nizan khan Hunthar emaw Ramhlun Sporting Club ten semifinal hnu­hnung zawk an khel a, June 20-ah final khelh tur a ni ang.

Tualchhung team ṭha ni ṭhin TNT hian a tir aṭanga thapui thawh nghalin bul pawh an ṭan chhe lo, set hmasa berah 6-4 in hma an hruai. Mahse, Chhinga Veng hian zawi muanga pawtthlain 25-17 set an la.

Laldensanga leh Lal­lungmuana telna TNT lam­in set hnihnaah 15-15 nih pui thei mah se hun pawimawhah an huaisen tawk lo niin a lang a, Chhinga Veng bawk an dingchang.

Set hnuhnung berah Gurinder Singh a inlar. India captain hlui hian set hnuhnung ber bikah point 12 thawk chhuakin a vawi hnih nan LG D3 Player of the Night atan thlan a ni.

Chhinga Veng hian state pawn player Gu­rin­der Singh leh Mandeep Singh te an nei a, an rin­­tlak. Tualchhung pla­yer cap­­tain Lalrin­chhana Ren­thlei bak­ah Lalngilneia leh Lallianmawia Pachuau an neih bawk avangin cham­pion thei tura rinkai an ni.