Premier League fixture a chhuak ta
Nimin khan season thar Premier League fixture tihchhuah a ni a, champion lai Chelsea-in match hmasa berah Burnley an mikhual ang. England-a football league sang ber hi 12-13 August khian khelh ṭan tur a ni.
Nakkum June 14 aṭangin Russia-ah FIFA World Cup khelh a nih dawn avangin England-a league sang ber pawh hi season hmasa aiin kar khata zawh hma tur a ni a, match hnuhnung ber hi May 13, 2018 ah khelh a ni ang.
Kai thar lam
Newcastle United-in Championship-ah season khat lek hmangin champion ni chungin an rawn kir a, Tottenham Hotspur an mikhual nghal dawn.
Pahnihna nichunga Premier Legue khel tura tling Brighton & Hove Albion-in Pep Guardiola kaihhruai Manchester City an mikhual dawn avangin an hmabak a hau tak dawn. Playoff hmanga inpettling Huddersfield-in Crystal Palace an tlawh dawn a, kai thar zingah an bul ṭan dan tur a thlanawm ber.
Club lian lam hi...
Arsene Wenger hoa Europa League khel tur Arsenal-in an match hmasa berah Leicester City an mikhual dawn. Gunners-in August thlaa an hmachhawn tur zingah nikum season ṭantirha an ngam loh Liverpool a tel a, he inkhel result hian nghawng lian tak a nei dawn.
Chelsea-in kar hnihna lekah Tottenham Hotspur an tlawh dawn a, September thlaah Arsenal leh Manchester City te an khelhpui dawn. Antonio Conte hote hian Champions League an khelh bawk dawn avangin nomawi humhim a hau tak sawt ang.
UCL group stage match hmasa ber hi 12-13 September-ah khelh tur a ni a, Liverpool-in Jurgen Klopp-a hnuaia Europe inelna an hmachhawn hma hian Manchester City an tlawh dawn a, squad neih chhah a pawimawh ang.
August thlaa Manchester City khingpui tur zinga lian ber chu Everton an ni a, amaherawhchu Pep Guardiola hote hian September thla tir leh tawpah Liverpool leh Chelsea an hmachhawn dawn. United erawhin Premier League ṭan hmain Real Madrid nen UEFA Super Cup an khel dawn a, October thla aṭangin Champions League-a khel pha club an hmachhawn dawn chauh avangin season ṭantirha dinhmun sawhnghet an tum ang.
White Hart Lane an chei ṭhat avangin Tottenham-in Wembley Stadium chu home match khelh nan an hmang dawn a, kar hnihnaah Chelsea an mikhual nghal dawn a, inkhel ngaihven hlawh tak tur a ni.
Krismas vuakvet
English league sang ber club-te hian krismas leh kumthar inkar ni kua chhungin league match vawi li an khel dawn. December 2 leh January 1 chhungin club pakhatin match riat an khel ang.
Arsenal-in krismas hma ni hnihah Liverpool an mikhual ang a, kumthar niah Chelsea an mikhual leh bawk dawn. London club fixture hi a hautak dawn hle.
Game Week hmasa ber fixtures
Arsenal vs Leicester City
Brighton and Hove Albion vs Manchester City
Chelsea vs Burnley
Crystal Palace vs Huddersfield Town
Everton vs Stoke City
Manchester United vs West Ham United
Newcastle United vs Tottenham Hotspur
Southampton vs Swansea City
Watford vs Liverpool
West Bromwich Albion vs Bournemouth