Asian Cup qualifier India mawina Sunil Chhetri

Kum 32-a upa ni tawh mah se Sunil Chhetri a la tar lo - India captain hian Thawhlehni zan khan Mizo tlangval Jeje Lalpekhlua puihnain Kyrgyz­stan tlarhnung pal darhin a pet goal a, India chu 1-0 in hnehna a chanpui.

AFC Asian Cup 2019 qualifier-ah match hnih khelh a ni tawh a, India-in hnehna an chan zat chu vawi hnih a ni - Kyrgyzstan hma hian Myanmar chu khualmualah Chhetri goal hmang vekin an lo hneh tawh a, Group A-ah hmahruaitu dinhmun an luah mek.

Tu nge inlan?

Sree Kanteerava Stadium, Bangalore-a inkhelah India tan Jeje Lalpekhlua'n inkhel bul a ṭan a, tlarhmaah Sunil Chhetri nen an inkawp. India tan Gurpreet Singh Sandhu chu si ban nghaktu a ni a, tlarhnungah Narayan Das, Anas Edathodika, Sandesh Jhingan leh Pritam Kotal an inkawp.

Midfield laiah Khasi play­maker Eugeneson Lyngdoh leh Goan pa sang Rowllin Borges an inkawp a, mual vei lamah Jackichand Singh leh Halicharan Narzary-te chu goal nawr tura dah an ni bawk. Bench lamah Jerry Lalrinzuala leh Daniel Lalhlimpuia an awm a, Mizo rawlthar pahnih hi luhtir an ni lo.

India an vannei

Ṭan aṭanga minute 20-na lekah India-in Jackichand Singh hmangin goal khungna hun ṭha nei mah se Manipur winger hian Jeje-a nena ball an inpek hnuah goal-ah a chantir thei lo. Minute 35-naah Jeje-a'n hun ṭha nei ve leh bawk mah se goal-ah a chantir thei lo a, Kyrgyzstan tana Mirlan Murzaev hun ṭha neih chu a hun taka Sandesh Jhingan inrawlh zarah a goal lo bawk - goal lut loin chawlhlawk hman a ni.

Chawlhlawk hman a nih hnuah pawh India aiin mikhual team an hlauhawm zawk a, Norwegian club Stabaek first choice keeper Gurpreet Singh leh tlarhnung laia Anas Edathodika leh Sandesh Jhingan-te inkawp khelh ṭhat ni ni lo se India hi goal chhuah thei dinhmunah an ding - Ukrainian second division club Cherkaskyi Dnipro winger Akhlidin Israilov-a'n woodwork a pet per chu an ui khawp ang.

Chhetri a mawi

Minute 69-na a ni tawh a, goal khung tumin Kyrgyzstan-in India an nawr bet. Mahse, mikhual team ball an inpe sual a, Sunil Chhetri ke bulah ber kher a tla. India captain hian chak taka ball tlanpuiin amah dan tumtu Kyrgyzstan midfielder leh defender rual a bum tlang a, ball pek rema insiamrem Jeje hnenah ball a pe. Hnahthial tlangval hian player class sang bik a nihzia pholangin Chhetri tan a 'chip' zeuh a, Bengaluru striker hian a ke bula tla ball hi mawi zetin a khung.

Kyrgyzstan-in an si phurh an sut thei lo a, India an chak. Sunil Chhetri goal ropuiin fak a hlawh a, fak hlawh loh rual lah a ni hek lo - India chakna goal khatah hian tumruhna, thiamna, inrintawkna leh finishing 'tawih' hmuh turin a awm vek a, Sunil tana duhthusama ball lo siamsaktu Jeje hming thaibo a thiang lo bawk.

India dinhmun

January 5 - February 1, 2019 inkara neih tur AFC Asian Cup hi United Arab Emirates-ah nghah a ni dawn a, ram 24 an inel dawn. FIFA World Cup qualifier ni bawk, second round qualifier aṭangin team 12 UAE, Qatar, South Korea, Japan, Thailand, Saudi Arabia, Australia, Uzbekistan, Iran, Syria, Iraq leh China an tling chiang tawh a, team 24 dangin third round-ah hmun ruak dang 12 an inchuh leh mek.

Team 24 hi group parukah pali ṭheuha dah an ni a, group tin aṭangin a sang pahnih zelin Asian Cup an khel dawn. India hi Group A-ah Kyrgyzstan, Myanmar leh Macau nen an awm ho a, vawi hnih khelhah vawi hnih chak tawhin group hmahruaitu an ni mek a ni.

Goal 'Cial'

India tana goal mawi khung­tu Sunil Chhetri chuan, "He ram tan hian kum 12 chhung ka khel tawh a, zanin kan inkhel kha kan game ṭhat ber ṭum a ni. First half-ah kan talbuia deuh tih phat rual a ni lo a, mah se second half a nih meuh kha chuan ṭha takin kan khel tawh. Ka career-a ka game ṭha ber pawl a ni hial ang," tiin an khelh dana a lawm thu a sawi.

Chhetri chuan a goal chung­chang sawi nghalin, "Ball ka tlanpui lai khan vawi hnih ngawt tackle ka ni a, mah se keimah leh keimah infuihin 'tlu reng reng suh' tiin ka in­hrilh. A hnuah khan Jeje-a hnen­ah ball kha ka pe a, ani khan duhthusama ṭhain min lo siamsak a ni. Mahse, ka goal khung kan lawm hnu lawkah khan 'game a la tawp lo' tih hi player dangte kha ka hrilh a ni," a ti.