Nadal a chawl dawn

Rafael Nadal chuan tun hma lama hlawhtlinna a chan tawhna hmun Aegon Championship-ah a inlan theih loh tur thu a sawi.

Kum 31-a upa Nadal hi tun season-ah a inkhel tam tawh hle, match 46 hnehna chang tawhin ṭum ruk a chak lo thung. Wimbledon ṭha tak a khelh theih nan a mimal doctor chuan chawlh a mamawh thu a hrilh a, hei vang hian a inhnukdawk ta a ni.

Wimbledon vawi hnih champion tawh Na­dal chuan, "Chawlh ka mamawh, tun hma angin tournament zawng zawnga inlan thei ka ni tawh lo. Doctor thurawn ka zawm a ngai a, harsatna nei loin Wimbledon khelh ngei ka duh a ni," tiin a sawi.

Aegon Championship hi June 19 aṭanga khelh ṭan tur a ni a, grass court-a khelh a nih avangin Wim­bledon inbuatsaih nana hman ṭhin a ni. He hmunah hian kum 2008 khan Nadal hi a champion a, Wimbledon-ah a hlawhtling zui bawk.

Spain tlangval hian kuminah result ṭha a neih hnem tawh avangin chan­chin lawmawm dang a nei zel. Season khar nana player cheṭha zual pariat te inelnaa tling thei hmasa ber a ni. London-a neih tur ATP World Tour Final-ah hian kumin chhung bika ranking point hmu hnem te an inlan dawn a ni.