France ngam lotu England

England-in FIFA World Cup qualifier-a Scotland laka point khat chauh an hlawhchhuah hnuah Thawhlehni zan khan Gareth Southgate hote hian player 10-a khel France 3-2 in an hneh lo.

France-in an mual Stade de France-ah an mikhual aiin inkhelh an thiam zawk tih an lantir a. Khawvel player manto ber Paul Pogba, Borussia Dortmund forward Dembele leh kum 18 mi Monaco striker Kylian Mbappe awmna team hi an hmabak a êng hle.

Goal nga

England-in minute 9-na lekah France tlarhnung mawi taka ṭhiatin Harry Kane hmangin goal hmahruai an khung nghal. Amaherawhchu, mualneitu lam tiphurtu chauh a nih avangin Burnley goalkeeper Tom Heaton a rim hle.

Minute 22-naah English keeper Heaton hian Olivier Giroud goal khung tur dang mah se a per chu Samuel Umtiti-a'n siphurh sut nan a hmang. First half tawp hma minute hnih a la awmin Dembele ball pet chu Heaton bawkin a dang a, a per chu Monaco FC Djibril Sidibe-a'n hmahruaina goal khung nan a hmang ve leh bawk.

Second half ṭan aṭanga minute hnihna lekah Dele Alli-a'n France defender Raphael Varane lakah penalty a hlawh chhuak a, video assistant referee Marco Guido a inrawlh hnuah pawh penalty thutlukna tho niin Harry Kane-a'n siphurh sut nan a hmang.

France-in kim loin khel chhun­zawm mah se goal hmaah an hlauhawm chhunzawm a, minute 78-naah Mbappe ball pek chu Borussia Dortmund forward Dembele-a'n chakna goal khung nan a hmang.

Inenchhinna!

Southgate-a'n tlarhnungah pound maktaduai 47.5 man John Stones chu Phil Jones leh Gary Cahill te a karcheh tir a, wing back-ah Kieran Trippier leh Ryan Bertrand te chu a chhawr bawk.

French rawlthar duhawm pahnih Mbappe leh Dembele ten England tlarhnung an chaih buai hneh hle. England manager-in nipui chawlh lai pawhin khelh dan phung thar duang turin a rilru a sen a ṭul dawn a ni.

Chutihrualin Southgate hian captain nghet erawh a neih thuai a rinawm a, France lama goal hnih khungtu Harry Kane chu Wayne Rooney thlaktu a nih ngei a rinawm ta. Spurs forward hian FIFA World Cup qualifier-a Scotland laka point hlawhchhuah turin goal pawimawh a khung tawh bawk.

England buaina goalkeeper-ah harsatna a la awm chhunzawm zel a, kum 31-a upa Heaton-a'n tlarhnung aṭangin thlawpna a hmu ṭha tawk lo. Second half-a inlan Jack Butland pawhin tih ṭhat nei bawk mah se Joe Hart aia rin a la harsa ang.