Nantes manager thar Ranieri

Premier League-a Leicester City champion puitu Claudio Ranieri chuan season thar aṭangin French Ligue 1 club Nantes a enkawl dawn. Kum 65-a upa Ranieri hian team enkawl kawngah tawnhriat a ngah tawh hle, manager a nih hnuah club 17 a enkawlna tur chiah a ni.

Italian manager hian kum 2015-16 season khan Foexes chu league nomawi chawi pui mah se season liam ta khan beisei a phak lo a, kumin February thla khan a hna aṭanga ban a ni.

Thla thum chhung hna a neih loh hnuah tunah chuan Ranieri hian Sergio Conceicao hmunruak a luah dawn. Kum 42-a upa Conceicao hian Porto enkawl turin a hna hmasa hi a bansan a ni.

Ligue 1 lamah pawh Ranieri hian tawnhriat a nei tawh. Kum 2012-13 khan AS Monaco chu second division aṭangin Ligue 1-ah a hruai kai a, a season lehah pahnihna niin Paris St-Germain chiah tluk loh an nei.

France-ah Ranieri tan hna a awlsam dawn lo. Nantes hi league-ah vawi riat champion tawh mah se an hlawhtlin hnuhnung ber chu 2001 daih tawh kha a ni. Season tharah Monaco leh PSG elphak tur chuan hmasawn an ngai khawp ang.