Champions Trophy ; India kalkawngah Bangladesh ding dawn
ICC Champions Trophy-ah an nomawi kawl lai humhim turin India-in match hnih chiah chak an mamawh tawh - vawiin tlai dar 3:00 hian Bangladesh nen semifinal an khel dawn a, hnehna an chang a nih chuan nimina England leh Pakistan inkhela chak zawk final-ah an hmachhawn ang. He thuziah a nih lai hian England leh Pakistan result kan hre hman lo.
Boruka a 'hot'
Semifinal-ah India leh Bangladesh an inhmachhawn dawn tih a chian hnuah ram pahnih intum tur hian boruak a vaw 'hot' nghal a, titi a ti tam hle - hei hi 2015 World Cup-a India-in quarterfinal aṭanga Bangladesh an hnawhchhuah aṭanga boruak kal zel a ni. Melbourne Cricket Ground (MCG)-a inkhelah khan India hian run 109 ngawtin ṭhenawm ram hi an sawp a, run 137 siamtu Rohit Sharma chu run 91-a siam laiin a out nia ngaiin referee chungah Bangladesh an lungawi lo.
Bangaldesh-in quarterfinal-ah chiang takin India hneh lo mah se an chak loh an tuar thiam lo a, an media lam thlengin India sawiselna a ri ring hle. World Cup hnu lawkah ram pahnihin series an khel a, rin hlawh lo Bangladesh an chak. Bangladesh ram media-ten an fast bowler Mustafizur Rahman-a'n blade a keng lai lem hnuaia Indian batsman-te lu lehlam ziahkawlh lai an siam chawp chu an pholang chuai chuai a, India-in hei hi a helh hle.
Phuba lakna chu
Bangladesh-in India an hneh ve 'chhunah' awmdan chin tawk an hre lo. T20 Asia Cup final-ah March 6, 2016 khan an intawng leh a, an intawn hma hian Bangladesh fast bowler Taskin Ahmed-a'n MS Dhoni 'lu' a keng lai lem an thehdarh leh chiam. Mahse, inelna chu pawnah ni loin khelmualah a ni tih India-in an pholang a, wicket riata
ṭhenawm ram hi sawpin nomawi an chawi - Bangladesh an ṭap.
March 23, 2016-ah T20 World Cup-ah India leh Bangladesh an intawng leh a, The Tigers (Bangladesh sawina) hian hnehna chan ve tawh an inbeisei. Over tawp berah Bangladesh-in chak turin run 11 an mamawh a, over a vawm hmasak pahniha run 20 petu Hardik Pandya chu India chhanna neihchhun a ni. International match-a last over la vawm ngai lo bowler hian a tirah vawm fuh lo mah se Bangladesh batsman-te vawm out-in India chu run khat lekin hnehna a chanpui - Bangladesh an ṭap nawn.
Phuba beisei Bangladesh
Bangladesh-in India laka an chak an lawm chu 2015 daih kha a nih tawh avangin vawiinah chak ngei an duh dawn. Kalkawng awlsam erawh a ni dawn lo. India opening pair Shikhar Dhawan leh Rohit Sharma hi Bangladesh neih Tamim Iqbal leh Soumya Sarkar nena khaikhin tur chuan an ṭha lutuk hret a, Imrul Kayes emaw Sabbir Rahaman hi Virat Kohli pheikhawk hrui phelh tlak pawh an ni rih lo.
Mahendra Singh Dhoni hi ODI-ah chuan 'legend' a ni der tawh a, Bangladesh chhuanvawr Mushfiqur Rahim te ang tan chuan 'Ka u' tia koh chi an la ni rih. Bangladesh tan Mahmudullah Riyadh hi 'match winner' tih hming hial pek ni mah se khawvelah eng team mahin Yuvraj Singh aiin an thlang lo ang. Bangladesh innghahna tur chu bowling lamah Mashrafe, Taskin, Rubel leh Mustafizur te an nih hmel a, India-in Bhuvneshwar Kumar, Jasprit Bumrah leh Hardik Pandya an la nei ve cheu - a tawi zawnga sawi chuan en maiin India an ṭha zawk tih a chiang a, a chinfelna tur erawh khelmualah a ni ang.