Roma coach thar Di Francesco

AS Roma chuan an midfielder hlui Eusebio Di Francesco chu an manager thar atan an puang. Di Fran­cesco hian Inter Mi­lan pan tu Luciano Spalletti hmunruak a luah dawn a, kum hnih daih contract a ziak.

Kum 47-a upa Di Francesco hian player a nih laiin kum 1997-2001 inkar khan Roma tan a khel a, a season hnuhnung berah hian Serie A nomawi a chawi pui hial.

Inkhelh a chawlhsan hnuah coaching lamah inhmang zuiin Virtus Lanciano, Pescara leh Lecce te a enkawl tawh a, tun hnai season nga chhungin Sassuolo a enkawl bawk - Serie B club hi Italy-a inelna sang ber Serie A-ah hruai kaiin kum 2016 khan Europa League khel turin a tlin pui hial a ni.

Player a nih laia Italy tana match 12 inlan Di Francesco chuan, "Ka club hmangaih ka enkawl thei tur hi ka lawm. A vawi khat nan Champions League-ah team ka kai­hruai dawn a ni a, ka theih­na zawng zawngin ka bei ang," tiin a sawi.

Roma hian season hmasa khan league-ah point 87 hmuin pahnihna an ni a, pakhatna Juventus chu point li chiahin an phak lo - playoff khelh ngai loin Champions League group stage an khel dawn a ni.