Son Heung-min a hliam na

Tottenham Hotspur forward Son Heung-min chu Korea leh Qatar inkhelh ṭumin a ban dinglam ruh a tliak.

Thawhlehni zan khan Jassim Bin Hamad Stadium-ah World Cup qualifier kelh niin Qatar-in Korea 3-2 in an hneh. He inkhelah hian Son leh defender Mohammed Musa ten ball kang an inchuhna lamah Spurs forward hi a tla sual a, minute 33-naah lakchhuah a ni.

South Korea coach Uli Stielike chuan, "Endik nawn tur a ni, a lan dan mai chuan a tliak niin a lang, a dinhmun a ṭha lo," tiin chawlh a mamawh tur thu a sawi.

Kum 24-a upa Son hian season liamta khan North London club tan inelna hrang hrangah goal 21 khungin April thla khan Premier League player of the month atan thlan a ni. Son hi Spurs bakah Korea tan player pawimawh niin match 53 a khelh aṭangin goal 17 a khung tawh bawk.

Asian World Cup qualifier Group A-ah Korea hian point 13 hmuin pahnihna an ni a, an chungah point 20 hmu tawh Iran an awm.

Inkhel dangah Group B hmahruaitu Japan chu an group a hniam ber dawt Iraq nen 1-1 in an inhnehtawk. Japan hian point 17 hmuin an hnuaiah Saudi Arabia (16 points) leh Australia (16) te an awm bawk.