James-a'n GSW a dah sang

NBA Most valuable Player atana vawi li thlan tawh LeBron James chuan Golden State Warriors chu kumin mai ni loin season lo awm leh turah pawh team ṭha tak an nih a rin thu a sawi.

Golden State hian James-a khelhna Cleveland Cavaliers lakah 4-1 a hneh changin NBA nomawi an chawi a, title la tur hian playoff-a chak zawn rei ber record an siam bawk.

Cavs star James chuan, "An team-ah hming lang­sar an tam, an player pawi­mawh tak takte hi kum 30 hnuai lam an la ni bawk. Ka hmuh dan chuan season lo kal leh turah pawh team ṭha an ni dawn a, kum khat mai ni loin a aia tam pawh an la ṭha zel ang," tiin a sawi. Golden State player langsar zingah Kevin Durant, Stephen Curry, Klay Thompson leh Draymond Green te hi kum 30 la tling lo vek an ni.

Kum 32-a upa James hi NBA player zinga sulhnu nei ṭha berte zinga mi a ni a, nomawi vawi thum a chawi tawh. Kumin final game 5-ah pawh triple double a nei thei hial. Mahse, season hmasa lama a lehthal theih Warriors lakah thil mak a thlen nawntir thei tawh lo.