Argentina leh Brazil-in goal khung hnem
Football thiam ram pahnih Argentina leh Brazil ten Singapore leh Australia match an khelh pui a, goal an khung hnem dun hle. Jorge Sampaoli nauten goal ruk an khung laiin Tite enkawl Brazil pawhin goal li an khung ve bawk.
Thawhlehni zan khan Singapore FA chuan a kum 125 tlin lawm nan Argentina chu friendly match an kheh pui. Lionel Messi leh Gonzalo Higuain te inlan lo mah se goal khungah harsatna an tawk lo.
Singapore National Stadium-a inkhelah world champion vawi hnih ni tawh Argentina tan hian Federico Fazio, Joaquin Correa, Alejandro Gomez, Leandro Paredes, Lucas Alario leh Angel Di Maria ten goal khat ṭheuh khungin an chak chiang hle.
Sevilla manager hlui Sampaoli-a'n an ram team a enkawlna hmasa berah Brazil chu si khat faiin a hneh pui tawh bawk a, Singapore an hneh leh tak avangin World Cup qualifier khel turin inrintawkna an neih belh ngei ang.
Argentina hi tun hnai an match hnihah goal sarih khungin an lamah a lut lo, mahse hei hi inchhuanna tur a la tling lo ang - friendly match ve ve a ni. Sampaoli-a'n fiahna tak a hmachhawn hun tur chu August 31 niin World Cup qualifier match pawimawh khel turin Uruguay an lenchilh dawn a ni.
Brazil an tho
Argentina an hneh loh hnuah Brazil an chesual nawn tawh lo. Nakkum World Cup khel tura inpet tling thei hmasa ber ram hian Australia 4-0 in an sawp.
Melbourne-a inkhelah world champion vawi nga ni tawh Brazil tan hian Diego Souza chuan inkhel ṭan aṭanga second 11-na lekah goal hmahruai a khung a, darkar khat zet goal dang a lut zui lo.
Neymar a inlan loh avanga captain arm band hrengtu Philippe Coutinho-a corner pet aṭanga ball lo kal chu minute 62-naah defender Thiago Silva-a'n an goal hnih nan khungin, midfielder Taison chuan a khung chhunzawm bawk - Souza hian second half-ah an goal lina a khung belh bawk a ni.
Tite kaihhruai Brazil hian August 31 hian World Cup qualifier khel turin Ecuador an mikhual leh ang. Russia pan tura an tlin chian tawh avangin Tite-a'n a duh a nih chuan player langsar lo zawk enchhin nan a hmang thei tawh ang.