City vs Reds- Season tir aṭangin a 'hot' nghal e!
Premier League champion leh FA Cup champion ten an khelh ṭhin Community Shield chu zanin dar 9:30 hian khelh a ni dawn a, Manchester City leh Liverpool an intawng dawn.
Season hmasa Premier League-a team pahnih daidantu chu point khat chauh a ni a, season tawp niah Pep Guardiola enkawl City an champion - khatihlai boruak kha chu thua sawifiah chi a ni lo.
Football ngainatute chuan Pep leh Klopp-a te vanglai Premier League-a an hmu thei chu vannei an inti a, khuareiah pawh football khelh a nih chhung chu coach pahnih inelna hi sawi a hlawh fo dawn.
Chutiang taka team intiat tawk, coach thluak ṭha em em pahnihin an enkawl chu zaninah an intawng dawn a ni a, football fan-te inkhel hmuhnawm en turin kan inpeih tawh em aw?
Goal beiseina
City leh Liverpool an inhma-chhawn dawn a, beisei sual lo tur chu goal a ni - season hmasa Premier League-ah khan Pep-a team ten goal 99 an khung a, English top flight league-ah goal khung hnem ber an ni.
Pep-a naute hnaih bertu chu Liverpool an ni a, Merseyside club hian goal 94 an khung - anni pahnih hnaih leh ber Chelsea chuan goal 76 an khung ve hram a, hei hian tlarhmaa team pahnih ṭhatzia a pholang.
Season hman zawh takah khan team pahnih hi vawi thum an intawng a, league-ah vawi hnih an inhnehtawk a, FA Cup-ah Liverpool-in hnehna changin City hi an pet chhuak thung.
Premier League match hnihah hian 2-2 ve vein an inhnehtawk a, FA Cup semifinal-ah 3-2 in Reds an chak thung - match thumah goal 13 ngawt a lut tihna a ni a, zaninah pawh attacking football hmuh beisei a sual lo ang.
Haaland vs Nunez
Team pahnihin goal khung an thiamzia inhrilh nawn a ngai lo a, goal khung tur an la lei belh ve ve zui! City-in Julian Alvarez an neih belh a, chu aia langsar erawh Erling Haaland a ni a, Borussia Dortmund aṭangin pound maktaduai 51-in an lalut.
Norwegian striker hi kum 22 lek la ni mah se, a kum naupan anga teh chi a ni lo - German club-ah match 89 khelin goal 86 a khung a, ram tan match 21-ah goal 20 a khung bawk!
City-in Haaland an chhuan viau chuan Liverpool-in Darwin Nunez an nei ve tho tih erawh hriat a ṭha. Reds hian £85mtd thlenga a man sang chho thei turin Uruguayan striker hi an lei a, Liverpool player man to ber a ni thei.
Kum 23 mi chauh la ni mah se season hmasa khan Benfica tan match 41-ah goal 34 a khung a, zaninah Haaland nen an inlan a nih ngat chuan an intawng tur hi en châkawm tak a tling.
City an ṭha
Team pahnih squad en ila, Premier League-ah club dang tan chance a awm thei ang em, tih tur hial khawpin an squad a chhah ṭha a, zanina an inrem dan tur hmuh a châkawm tawh hle.
City bikah chuan Pep-a'n 4-3-3 hmangin a naute a rawn rem a rinawm a, Ederson chu si ban nghak tur chianga ngaih a ni. A laiah Reuben Dias kawppui turin khup hliam Aymeric Laporte-a'n ngai a la awh lo a, John Stones a din a rinawm.
Kyle Walker leh João Cancelo ten fullback hna an chelh leh ang a, midfield-ah an thiampuipa Kevin De Bruyne hoin Bernardo Silva leh Rodri ding tura ngaih an ni. City-in £45mtd man Kalvin Phillips la thar mah se Rodri nek chhuak tur khawp player a ni lo.
US-a pre-season tour-a zin lo zingah Ilkay Gundogan leh Phil Foden ten bul an ṭan a la rinawm lo a, chuti a nih chuan tlarhmaah Riyad Mahrez, Haaland leh Jack Grealish an inkawp a ṭul dawn tihna a ni.
An damlo!
City-in buaipui hluai ngai khawpa player pawimawh inhliam an nei lem lo a, Liverpool erawh first choice keeper Alisson Becker a inhliam a, second choice Caoimhin Kelleher a inhliam bawk.
Klopp-a'n Spanish keeper Adrian chungah rinna a nghah a ṭul dawn tihna a ni a, Haaland hoa City goal nawr na tak dang turin rin ngam a harsa - mahse, a hmaah Virgil van Dijk, Joel Matip, Trent Alexander-Arnold leh Andy Robertson ding tura ngaih an ni a, Reds fans tan thlaphan lutukna tur a ni lo.
Midfield-ah captain Jordan Henderson, Fabinho leh Thiago Alcantara te bul ṭan tura beisei an ni a, tlarhmaah Diogo Jota a la inhliam avangin Mohamed Salah leh Luis Diaz chu bul ṭan chiang tura ngaih an ni.
Mahse, Klopp-a'n a laiah Roberto Firmino nge Nunez a rin ang tih chu zawhna awm thei a ni a, Brazilian forward zawk hian bul a ṭan ta hlauh a nih pawhin mak tih viau tur niin a lang lo. Liverpool player zingah Kostas Tsimikas, Alex Oxlade-Chamberlain leh defender thar Calvin Ramsay te an inhliam mek bawk a, anni erawh bul ṭan tura beisei an nih loh avangin chi aina tur a ni lo.
Community Shield
July 30, Inrinni Zan
Liverpool 9:30 PM Manchester City
*Inkhel hi Sony Ten 2-ah a en theih dawn a, online-a en duh tan SonyLIV leh JioTV-ah a en theih bawk ang.
Manchester City Probable XI:
Ederson; Walker, Dias, Stones, Cancelo; Silva, Rodri, De Bruyne; Mahrez, Haaland, Grealish
Liverpool Probable XI:
Adrian; Alexander-Arnold, Matip, Van Dijk, Robertson; Henderson, Fabinho, Thiago; Salah, Firmino, Diaz
Head to head
Liverpool chak: 106
Draw: 56
Manchester City chak: 58
Community Shield hi kan lo khel fo tawh a, kan chak thei a nih chuan a lawmawm ngawt ang. English football-a nomawi kan la chawi loh awmchhun a ni a, chak ngei turin kan bei ang. Zanina kan inkhel hian season thara kan nihphung tur a hril ang em, ka hre lo a, team ṭha tak pahnih inkhel turah ka beisei. Kan friendly match hnuhnung berah tlawm mah ila, kan khelh danah ka lawm a, zaninah pawh ṭha taka khelh ka beisei. - Jurgen Klopp, Liverpool manager