Central YMA Volleyball Kutpui a ṭiak dawn ta ; Zanin dar 8-ah Khawhai Vs Hunthar
Central YMA leh Mizoram Volleyball Association-in an buatsaih D3 Amrit Cement 22nd Inter Branch YMA Volleyball Tournament 2022 chu a ṭiak dawn ta. Zanin dar 8:00 hian R. Dengṭhuama Hall, Mualpuiah Khawhai leh Hunthar ten mipa champion an zawng ang.
Hunthar hian hnehna an chang a nih chuan CYMA Volleyball mipa inelnaa record nei ṭha ber an ni dawn a, Khawhai erawh an chak a nih chuan an vawi khat champion-na tur a ni thung. CYMA Volleyball mipa inelnaah hian Maubawk vawi thum an champion tawh a, Hunthar hi vawi hnih champion tawhin final-ah vawi ngat ngawt an vanduai tawh thung.
Nizan khan Bungkawn leh Kolasib Diakkawn ten hmeichhe champion an zawng a, result kan hre hman lo.
Sialhawk ṭhenawm Khawhai
All Mizoram Inter Village Football Tournament 2022 an khel zo chauh a, chhungkua 500 vel awmna khua Sialhawkin final an lut a, thawm pawh an nei ring hle. Sialhawk thawm neih ring ang chu tluk pha chiah lo mah se an khaw ṭhenawm Khawhai thawm hi a nep bik lo.
Khawhai hi Sialhawk aṭangin 16.4 km a ni a, minute 42 kal lek a ni. Sialhawk an puih keih keih chuan keini pawhin eng nge kan theih loh bik ang, ti ni awm takin Khawhai Branch YMA volleyball team-in Aizawl an pan.
Volleyball khelh thiam khua Khawhai hian player pawh an nei ṭha a, an vanglai hun an hmang mek. Tuipui Tuichangral games Champion lai an ni a, Tuichangral leh Khawhai Zone Champion nilai an ni bawk. Tuichangral leh Tuipuiral-ah tum tawk an awm meuh lo a ni ber.
PVL neih zawh takah Tuichangral VC tana khel Saidingpuia Sailo, Vanlalthlamuanpuia Sailo leh Lalhriatkima te bakah Hunthar tana khel Zomuansanga te an kawl. Season hmasa lama PVL-a khel Lalbiakvulmawia, PC Lalhruaimawia leh Lalhmunmawia te an awm bawk. Volleyball hi player parukin an khel ṭhin a, PVL player pasarih awmna team chu champion turin an ṭha tawk.
Khawhai hian player an nei ṭha ringawt lo a, inbuatsaihna a nei ṭha tel. July 12, 2022 aṭang khan Aizawla Pu Lalrinliana Sailo in, Luangmualah an camp a, Khawhai Branch YMA hruaituten an ṭhut chilh ngar ngar bawk. An inbuatsaih dan thlirin nomawi an duh tih a chiang.
Hunthar an ni tlat
Volleyball a nih tawh chuan Hunthar an chhe ngai lo a, CYMA Volleyball mipa inelnaah phei chuan vawi sarih ngawt final lut thei an ni. Hei bakah hian Hunthar hian PVL club an nei a, an player panga Remsangzuala (Lalmama), R. Lallawmkima, Laldampuia, Lalhruaizela leh Lalrinngheta te hi an veng club-a khel an ni a, Tuichangral-a khel Lalruatfela Sailo an kawl bawk.
PVL khel lai paruk bakah tawnhriat nei ṭha C. Laldawngkima an kawl a, ani hi 2009-a an champion ṭuma Best Spiker kha niin tunah chuan setter ṭha ber tiha chhal theih a ni tawh thung. Captain leh player pawimawh Lalmama hi spiker ṭha tak a ni a, setter a ni thei bawk.
Hunthar manager Zoramchhana chuan, "Lalmama hi chu player ṭha bik a ni a, khawiah pawh a ṭha. PVL leh CYMA Volleyball a inang lo a, kan ṭhat dan tur berin kan chhawr a, thuawih takin a khel zel. Dawnga hi tawnhriat nei ṭha a ni a, a set hi hlap nuam an ti ṭhin. Kan player-te hi an ṭha a, final-ah chuan tu pawh chak thei kan ni a, kan player-te erawh an ṭha hretah chuan ka ngai," tiin Vanglaini a hrilh..
Zoramchhana chuan sawi chhunzawmin, "Khawhai hian fans an nei ṭha a, Aizawl khaw pawn an nih avangin ṭantu an ngah a nih pawhin a mak lo ang. Chutihrualin Hunthar Branch YMA pawh kan inpuahchahna a ṭha a, ṭantu kan nei ṭha dawn a, champion ngei kan tum. Hei erawh hriat a ṭha a, inelna thianghlim tak kan khel tur a ni. Khawhai player pawimawh Zomuana hi PVL-ah chuan kan club-a khel a ni a, an chak ta zawk a nih pawhin duhsakna kan hlan," tiin a sawi.
Final Kalkawng
Second Round (Round of 64)
Khawhai bt Lunglei Electric
25-15, 25-19, 29-27 (3-0)
Hunthar bt Vangchhia
25-10, 25-20, 23-25, 25-16 (3-1)
Third Round (Round of 32)
Khawhai bt Kawrthah Hmarveng
25-9, 25-11, 25-13 (3-0)
Hunthar bt Farkawn
25-17, 25-15, 25-17 (3-0)
Round of 16
Khawhai bt Zuangtui
25-11, 19-25, 25-12, 25-13 (3-1)
Hunthar bt Kawnpui Chhimveng
25-22, 29-27, 25-11 (3-0)
Quarterfinal
Khawhai bt Champhai Tlangsam
27-25, 18-25, 25-22, 25-18 (3-1)
Hunthar bt Kulikawn West
25-15, 25-15, 25-22 (3-0)
Semifinal
Khawhai bt Chhinga Veng
25-16, 25-18, 25-22 (3-0)
PoM : H. Lalramdinmawia, Khawhai
Hunthar bt Zawlnuam Vengpui
28-26, 25-20, 25-12 (3-0)
PoM : Remsangzuala, Hunthar