Barcelona defender thar Jules Kounde

30th July, 2022

Nipui bazarah Barce-lona an che na takzet. Catalan club hian Chelsea hellai Sevilla defender Jules Kounde chu inremna an neihpui leh ta, pound maktaduai 41.85 sengin an lalut dawn - chanchinbu i chhiar hunah chuan contract an ziak fel tawh ang.

Kum 23 mi Kounde hian Nou Camp-ah 2027 thleng cham turin contract a ziak dawn a, tun nipui bazar chhunga Barcelona player lei thar parukna a ni ang - sum nei lo nia sawi Barca chet dan hi a mak angreng hle.

Kounde hma hian Pablo Torre, Franck Kessie, Andreas Chris-tensen, Raphinha leh Robert Lewandowski te an la tawh bawk, season tharah chuan Xavi-a'n Barcelona thar a din ngei dawn tih a chiang.

Barca a thlang
France international Kounde chuan, "Barcelona zawm theihna remchang ka nei hi ka lawm, club ropui takah team ṭha tak tana khel turin ka kal. Sevilla pawh kha club ṭha tak a ni a, mahse Barca chu ka hmasawn lehzual theihna tur niin ka hria.

"Barcelona ka zawm chhan pakhat chu Xavi a ni. Vawi tam tak kan inbia a, a hmathlir leh min khelhtir a tum dan chuan ka rilru a hneh, tun hma zawng aia ṭha leh puitling zawkin ka khelh theih ka beisei," tiin a sawi.

Spanish club hian Kounde bakah hian Chelsea nena sawi zawm Raphinha leh Lewandowski te pawh an lak khalh. Blues captain Cesar Azpilicueta nen pawh sawizawm an ni mek - English club tan chuan Barca hi melh no an harsa khawp ang.

Tlarhnung remphui
Lewandowski leh Raphinha an lei fel hnu khan, Barcelona president Joan Laporta chuan, "Tunah chuan tlarhnung remphui lam kan ngaihtuah tawh ang," tiin a sawi a, an player lei leh hmasak ber pawh defender Kounde a ni.

Barcelona hian Chelsea tana contract hmang zo Andreas Christensen an la tawh bawk. An neihsa Ronald Araujo, Gerard Pique leh Eric Garciate nen khelhna an inchuh dawn, tlarhnung laia khel tur duhthlan tur a nei ṭha dawn.

Bordeaux tan pawha khel tawh Kounde hi tlarhnung lai bakah ding lam sirah a hman theih, hei hi manager Xavi-a'n a duh chhan pakhat nia sawi a ni. Sevilla tan match 133 khel tawh a nih avangin La Liga-ah tawnhriat a nei ṭha tawk bawk.