Everton player thar McNeil

Premier League khel chhunzawm tur Everton chuan Dwight McNei an lalut. Burnley winger manah hian pound makatduai 20 an hmang a, season nga chhung an hnena cham turin contract an ziahpui.

McNeil hian Clarets tan match 140 a khel a, club tan player pawimawh berte zinga mi a ni. December 2018 hnuah Premier League match khelh loh vawi hnih chiah a nei, a dam ṭha a nih chuan a khel ziah.

Frank Lampard-a enkawl Everton hian forward Richarlison chu Tottenham lakah an chân. Tun nipui bazar chhungin McNeil bakah hian James Tarkowski leh Ruben Vinagre te an lalut ve tawh thung a ni.

Kum 22 mi McNeil chuan, "Everton-in min ngaihven tih ka hriat aṭang kha ka phur nghal. Frank Lampard enkawlna hnuaia inkhelh ka châk a, a kaihhruaina hnuaiah hma kan sawn zel theih pawh ka inring," a ti.

McNeil hian season hmasa khan Premier League-ah dribble hlawhtlin vawi 90 a nei a, ani aia nei hnem chu pakhat chiah a awm. Vawi 199 zet cross a neih pawh cross hnem pathumna a ni phak bawk.