A vawi 40 nan Alcaraz a chak

Carlos Alcaraz tan kum duhawm a ni chhunzawm zel. Ningani zan khan Spanish rawlthar hian Norbert Gombos 6-2, 6-3 in a hneh a, nomawi a kawl mekna Croatia Open-a match hmasa berah hnehna a chang.

Kum 19 mi Alcaraz hian season kal laiah match 40 zet hnehna a chang ta, season chawhnu lamah tournament khelh tur a la tam - a tan chuan kumin anga kum ṭha hi a her chhuak leh ang em, tih sawi a harsa.

Tun hnai khan world ranking chhuak tharah pangana a ni. Rafael Nadal (2000) hnuah world number 5 ni thei naupang ber a ni leh chiah, thla thara khelh tur US Open-ah pawh champion tura rinkai a ni dawn.

Alcaraz hian a match lehpekah chuan Facundo Bagnis a hmachhawn dawn. Ningani zan inkhel dangah Argentine tlangval hian Corentin Moutet chu 6-3, 6-1 in a lo hneh ve thung. Inkhel dangah Franco Agamenone leh Marco Cecchinato te pawhin hnehna an chang.