Commonwealth Games an ṭan

Infiamna khawvela khawmpui lian zinga mi Commonwealth Games 2022 chu Ningani zan khan an nei ṭan. Alexander Stadium, Birmingham-a hawnna hunah India tan PV Sindhu leh hockey team captain Manpreet Singh te chuan hnam puanzar an rawn keng a ni.

Kumin Common-wealth Games-ah hian ram hrang hrang 72 aṭangin infiammi 5,054 an kalkhawm a, infiamna peng hrang 280 zetah an inel ang. Inelna hian August 8 thleng a awh dawn.

India chuan CWG khel tur hian infiammi 210 a tir chhuak, an zinga 106 chu mipa niin hmeichhia 104 an ni thung. A tirah chuan hawnna hunah hian Neeraj Chopra chu flag kengtu tur a ni, mahse hliam vanga a inlan theih loh avangin Sindhu leh hockey team captain Manpreet Singh te koah a tla.

Hawnna hunah hian infiammi zawng zawng an inlan lem lo. Tun hnaia inelna hmachhawn nghal tur ho chu hahchawlhna hun pek an ni a, inbuatsaihna neih ngai ho pawh an inlan lo - tawnhriat ngah bakah inelna hmachhawn hnuhnung deuh tur thlan chhuah hoin stadium-ah kawng an zawh a ni.

Commonwealth Games hi Mizoram aṭang pawhin live a en theih a ni - Sony Ten, DD Sports leh Sony Liv (online) ten an ti chhuak reng dawn, mahni in lum aṭangin a en theih a, infiamna ṭhenkhat rei zawng a inan vek loh avangin a hunbi erawh tih danglam theih reng a ni thung.