Vettel thlahtu Hamilton leh Alonso

Sebastian Vettel-a'n tun season tawp rualin Formula 1 a chawlhsan tur thu a sawi a, inelna a hmachhawnpui ṭhin pahnih Lewis Hamilton leh Fernando Alonso te chuan German tlangval hi an thlah.

Mercedes car khalhtu Hamilton chuan, "A chawlh tur ka hriat khan pawi ka ti. Driver awm lai ho zingah chuan mite entawn leh mi hneh thei tak a ni a, ani nena inelna hautak leh ropui kan chhawpchhuah ṭhinte kha rilruah a lo lang nghal.

"F1 huangah a huhang a lian em em a, driver naupang zawkte entawn a ni. Seb, nang hi ka elpui hautak i ni thei hi ka tan chuan chawimawina a ni," tiin a elpui ṭhin driver chawl mai tur chu a dahsang thiam hle.

Britain tlangval Hamilton leh Vettel te hi an inum tawk thei hle, world champion vawi li ve ve an nih lai phei kha chuan tuin nge nomawi chawi belh ang tih kha zawhna lian tak a ni ṭhin, a hnu lamah erawh Lewis a hlawhtling chhunzawm ta zawk.

Tun hnai khan Vettel hi, "F1 huangah tu nge i elpui hautak ber?" tiin an zawt a, ani chuan Fernando Alonso a nih thu a sawi. Spanish driver hian Vettel pawh a lo ngaisang let ve tho a, a chawl mai tur chu a ui hle.

F1 champion hlui Alonso chuan, "F1 nomawi pali i chawi a ni satliah lo, driver leh mihring ropui bik zinga mi ni chungin i chawl dawn a ni. Car intlansiakna sang ber tana i hlutna hi a sang, kan ngai dawn hle. Tlankawnga kan inum laite hi a la ngaihawm dawn," a ti.

Season kal laiah Vettel hian inelna hmabak la awmte chu hmachhawn chhunzawm vek a la tum. Pathianni zan dar 6:30 hian Hungaroring tlankawngah Hungarian Grand Prix an tlan leh ang.