Arsenal captain hlui Neill-a a thi

Arsenal leh Northern Ireland tana captain armband hreng ṭhin tawhtu Terry Neill chu a thi. July 18, Ningani zan khan a thih thu hi puan a ni a, kum 80 mi a ni.

Neill hian kum 20 mi chauh a nih laiin Arsenal captain dinhmun a chelh thei. North London club tana captain ni thei naupang ber a ni hial a, kum 1957 leh 1970 inkar khan match 270 a khelhsak.

Kum naupangte ni chungin inkhelh a chawlhsan a, chumi hnuah team enkawl hna a thawk zui. Arsenal manager a nih leh pawhin kum 34 mi chauh a la ni, a club hi a zawnin FA Cup final vawi thum a thlenpui hial.

Northern Ireland tan match 59 a khel a, defender thluak fim tak a nih avangin an ram tan pawh captain a nih bakah a hnu lamah manager hna a thawk leh bawk a ni, a inkhelh hun chhung rei lo mah se sulhnu sawi tur a ngah hle.

Kum 28 mi chauh a nih laiin inkhelh a chawlhsan, an ram tan hian goal khung tam lo mah se a goal khung pakhat erawhin hriat reng a hlawh tawh ang. Kum 50 liam ta khan Wembley Stadium-ah England an hnehna goal a khung.

A hnu lamah Northern Ireland hian England hi an khelmual hmanthiamah hian an la hneh nawn leh lo, hun a kal rei tial tial ang a, he goal hi an la ngaihlu tual tual dawn tih a sawi ngam.

Arsenal chuan thuchhuah siamin, "Kan tan chuan player chauh a ni lo a, hruaitu ropui leh ṭha a ni. Entawn tur tam tak a hnutchhiah a, inkhelh a chawlhsan hnuah pawh Arsenal hi a mangṭha ve lo.

"Highbury-ah khan min lo tlawh fo ṭhin a, Emirates Stadium kan hman hnuah pawh a lo kal ṭhin. Club tana a hnathawh leh thil tihte hi kan hre reng tawh ang. Hun harsa an tawh laiin Terry-a chhungte leh ṭhiante kan theihnghilh lo," an ti.