Koulibaly thlaktu Min Jae

Napoli chuan an defender chhuak ta Kalidou Koulibaly hmun ruak luah turin Kim Min-jae an lalut. South Korea international defender hian pound maktaduai 16-in Italian club hi a zawm a, kum thum cham turin contract a ziak.

Fenerbahce defender hlui Min-Jae hi theihna nei sang tak nia sawi a ni a, kum 25 mi chauh a la nih avangin vanglai hmang chho tura ngaih a ni. 6ft 3in a sang a nih avangin ball kangah pawh a ṭha tawk viau tura ngaih a ni.

Napoli coach Luciano Spalletti chuan, "Tlarhnung thuam chak kan mamawh a, kan team tana khel thei tur hi uluk takin kan zawng. Min Jae hian kan chak lohna laiah min puih theih ngei ka beisei, a theihna anga khel chhuak tuin kan pui ang," tiin a sawi.

Season thar inbuatsaih nan Napoli hian Girona leh Espanyol te an la hmachhawn dawn. Serie A an match hmasa ber atan August 15 hian Verona an lenchilh ang.