Commonwealth champion Mizo Tlangval ; India fapa rangkachak Jeremy Lalrinnunga

Jeremy Lalrinnunga chuan Commonwealth Games 2022-ah India tan gold medal a chawi chhuak. Mizo tlangval hian 67kg huangah Commonwealth Games record thar siam chungin India tan gold medal a hlawh chhuak a ni.

Nimin tlaia inelna neihah Jeremy-a hian snatch 140kg a chawi a, inelna chanve an neih zawh hian a elpui dangte aiin 10kg zetin a chawi rit nghal. Clean & jerk chawi chhunzawm niin, 160kg a chawi leh a, total-ah 300kg chawiin a chungnung.

Jeremy-a hnuaiah hian Samao aiawhtu Vaipava Nevo-a'n total-ah 293kg a chawi a, pathumna chu Nigeria tlangval Edidiong Joseph (290kg) a ni thung. Weightlifting huangah hian a tiṭha zual 10 ten inelna an hmachhawn a ni.

Hnehna chu
Birmingham, England-a inelna neihah Jeremy-a hi champion tura rinkai a ni sa, inelna hmachhawn tura an chawina (entry list) en chuan Mizo tlangval hi a elpui ram dang mite aiin 10kg in a chungnung lawk a ni.

Inelna an hmachhawn a, lei aṭanga lak chhuaha char ngal (snatch) huangah Jeremy hi a che ṭha fal a, amah hnaih bertu Nigeria tlangval Edidiong Joseph aiin 10kg in a sang fal nghal, inelna la zo lo mah se a kut lehlamin medal a khawih tawh.

Lei aṭanga lak kan a, awma dah hnua char lehna (clean & jerk) an tichhunzawm. Jeremy-a'n a chawi hmasakah 153kg a zo a, a chawi zawh hian hliam a nei. Rei vak lo a hliam hi enkawl niin, a chawi chhunzawm thei lo mai ang tih hlauhna a lian hman.

Mahse, Mizo tlangval hi a rawn ding chhuak zui - a vawi hnih attemp-naah 160kg a rawn chawi nawlh, he a rit chawi hi gold medal lak nan a tawk. Clean & jerk bika amah hnaihtu Vaipava Nevo chuan Jeremy khum theihna tur chiah chawi a tum, mahse a chawi zo lo.

Fapa rangkachak
Mizo tan weightlifting hi tun hma chuan hnam dangte tih tura ngaih a ni ṭhin. Ainawn Veng (Govt Complex) a academy din a nih hnuah erawh rin ngai loh tak takin an khel a, chung zingah chuan Jeremy-a pawh a tel.

SYS coach Malsawma Khiangte-in a bul ṭanpui Jeremy-a hi a tir aṭangin naupang danglam a ni a, vai rama a inzir chhunzawm hnuah kum naupang tak ni chungin hlawhtlinna a chang hnem ta hle - Youth Olympic Games 2018-ah khan India tana gold medal la thei hmasa ber a lo ni tawh bawk.

Vanglaini chuan Commonwealth Games neih dawn khan Jeremy hi a bia a, ani chuan, "Pathian zarah ka chesual viau a nih loh chuan gold medal dawn ka beisei," a ti. Inrintawkna sang tak nen Birmingham a pan a, a sawi lawk ang ngeiin a rinchhan Pathian chakna ringin a chak.

Youth Olympic bakah 2021 Commomwealth Championship (weightlifting bik) leh Commonwealth Games 2022-ah a hlawhtling ta a, kum 19 mi chauh hian tunah chuan infiamna khawmpui lian ber Paris Olympic 2024 a thlir thei tawh ang.

MWA an lawm
Mizoram Weightlifting Association (MWA) senior vice president Lalthlamuana Fanai chuan, "Jeremy Lalrinnunga'n thih tha tawh tak meuha a beih hnua gold medal a la lai TV-a ka hmuh khan ka hnuk a ulh, ka lawm bawk si. Mizo tlangvalin khawvel hmuhah Mizo ropui taka a pholang kha ka chhuang.

"A pu, Pathian thuawihin a fuihna ṭhin, "Pathian au ṭhin rawh" a tih kha ka hre chhuak nghal. Mi invawng, insum thei, tumruh tlat leh Pathian ṭih tlat mi hi Mizoram Weightlifting Association chuan kan chhuang a, a hlawhtlinna hi thinlung takin kan lawmpui takzet.

"Mizo zinga Commonwealth Games a Gold Medal la thei hmasa ber a ni hi kan lawmpuiin kan chhuang em em a ni," tiin Vanglaini a hrilh a, an fapa duatlai chet danah an lungawi takzet a, hlawhtlinna sang zawk an beisei ngei ang.

Mirabai tan gold medal
Jeremy ang bawkin Mirabai Chanu hming hi India infiamna huangah chuan hriatreng a ni tawh dawn. Manipuri weightlifter hian Commonwealth Games neih laiah glod medal a chawi chhuak a, record thar a siam nghal bawk.

Hmeichhei weightlifting inelna 49kg huangah Mirabai hian 201kg a chawi a, ani aia chawi rit an awm lo. Snatch (88kg) leh clean and jerk (113kg) te chu CWG atan record a ni nghal, a sulhnu hi a theuneu lo hle.

Kum 27 mi Mirabai hian Tokyo Olympic-ah khan gold medal a lo chawi chhuak tawh bawk. Commonwealth Games bikah chuan 2018 Gold Coast-ah khan gold medal a la a, 2014 Glasgow khan silver medal a lo la tawh bawk a ni.