CYMA Volleyball khawmpui a ṭiak ta
Central YMA leh Mizoram Volleyball Association-in an buatsaih D3 Amrit Cement 22nd Inter Branch YMA Volleyball Tournament 2022 chu July 30, Inrinni zan khan a ṭiak a, R. Dengṭhuama Hall leng lo mipui an pungkhawm - volleyball kutpui a hlawhtling hle.
Inrinni zan hian mipa final hmuhnawm bikah Huntharin Khawhai chu 25-21, 25-19, 16-25, 22-25, 15-13 (3-2) in an hneh a, final-ah hian volleyball inkhel hmuhnawma tel tur chu a kim vek tiin a sawi theih. Hunthar hi a vawi thum nan CYMA Volleyball-ah an champion a, Maubawk nen champion zat inang chiah mah se pahnihna ṭum nga an nih tawh avangin record an nei ṭha ber.
Zirtawpni zanah hmeichhe final khelh a ni a, entu ṭhahnem tak hmaah Bungkawnin Kolasib Diakkawn lehthalin 23-25, 25-17, 25-17, 25-22 (3-1) in hnehna an chang. Bungkawn hian Kanan nih rualin vawi sarih an champion a; Kanan hi ṭum riat pahnihna an nih laiin Bungkawn erawh ṭum hnih pahnihna a ni thung.
Bungkawn nge nge
Hmeichhe volleyball-ah Bungkawnin bul an ṭan ṭha a, mahse a tawpah Diakkawnin rawn lehthalin 25-21 a ni. Set hnihnaah best spiker-a thlan F. Lalparmawii a rawn che ṭha lehzual a, ani hi team pahnih danglamna a ni zui. Bungkawnin 25-21, 25-19, 16-25, 22-25, 15-13 (3-2) a hnehna an chan kawngah F-i, captain leh setter Melody Lallawmkimi leh Bungkawn ṭantu ṭha te an pawimawh hle.
Kolasib Diakkawn captain Lalmuanpuii leh Flora Lalrinmawii te thawkrim mah se a hmawr an bawk thei ta lo a, chutihrualin final hmuhnawm tak an chhawpchhuah avangin fak an phu.
Best coach atana thlan Bungkawn coach Rohmingliana Khiangte chuan, "Bungkawn hian champion kan duh a, tun ṭum inelna atan pawh hian managing board kan din a, nomawi chawi turin theihtawp kan chhuah. Fan kan nei ṭha em em a, anni zarah tun hun hi kan thleng a ni," tiin Vanglaini a hrilh.
Hunthar an dingchang
Tualchhung Volleyball hmuhnawm sawi apiangin CYMA Volleyball 2022 final lam hmaih a thiang dawn lo. Huntharin best setter atana thlan C. Laldawng-kima tawnhriat neih ṭhaṭ, captain Remsangzuala huaisenna leh champion duh an veng mipui hmangin Khawhai chu 5-21, 25-19, 16-25, 22-25, 15-13 (3-2) an hneh.
Dawnga hi kum 2004-a Hunthar pahnihna an nih ṭum best spiker a ni a, Huntharin final vawi riat an khelhah a tel vek a, a tawnhriat ṭhatzia tun ṭum final-ah a lang. Final boruak a ṭang ṭha a, line judge thlak a ngai hial! Huntharin boruak sang an hmachhawn fo tawh tih a lang a, entu ṭhahnem tak leh boruak rip tak karah an huaisen zawk a, court chhung leh pawnah nomawi chawi theih nan theihtawp an chhuah.
Khawhai pawhin theihtawp an chhuah a, boruak ṭang ṭha et awt karah nungchang mawi an lantir a, an fakawm hle. A tawpah erawh a vanduai zawkah an ṭang a, inkhela thil thlen dan an thlir kir apiangin nomawi an chawi teuhzia an hria ang. Best spiker Saidingpuia Sailo, Lalhmingmawia (Mapuia) leh Vanlalthlamuanpuia (Mapuia Sailo) te an hmuhnawm a, an duh ber nomawi erawh an chawi thei ta lo thung.
Best coach atana thlan VL Malsawma Renthlei chuan, "Kan champion hnuhnun ber kha kum 2009 daih kha a ni a, champion duhin kan tui hal a, mipui pawhin theihtawp an chhuah. A tawpah a vannei zawkah kan ṭang a, kan lawm takzet a ni," tiin Vanglaini a hrilh.
Mipa Thlirna Tawi
Hunthar 3 - 2 Khawhai
25-21, 25-19, 16-25, 22-25, 15-13 (3-2)
PoM : Remsangzuala (Lalmama), Hunthar
Champion Hunthar
Rs. 50,000, Trophy, Medal, Certificate
Runners' up Khawhai
Rs. 25,000, Trophy, Medal, Certificate
Semi Finalist Chhinga Veng & Zawlnuam Vengpui
Rs 5,000 ve ve
Quarter Finalist Tlangsam, Khawbel, Kulikawn West & Maubawk
Rs. 2,000 ṭheuh
Best Spiker Saidingpuia Sailo, Khawhai
Best Setter C. Laldawngkima, Hunthar
Best Coach VL Malsawma Renthlei, Hunthar
Mimal lawmman hian Rs 1,000/- leh Trophy a keng tel.
Quarterfinal aṭangin Player of the match thlan a ni a, trophy pek zel a ni.
Hmeichhe Thlirna Tawi
Final - July 29, Zirtawpni
Bungkawn 3-1 Kolasib Diakkawn
23-25, 25-17, 25-17, 25-22
PoM : FP Lalduhkimi, Bungkawn
Champion Bungkawn
Rs. 50,000, Trophy, Medal, Certificate
Runners' up Kolasib Diakkawn
Rs. 25,000, Trophy, Medal, Certificate
Semi Finalist Armed Veng South & Kanan
Rs 5,000 ve ve
Quarter Finalist : Dawrpui Vengthar, Hlimen, Bethlehem Vengthlang & Thenzawl Field Veng
Rs. 2,000 ṭheuh
Best Spiker F . Lalparmawii, Bungkawn
Best Setter Lalrinzuali, Kolasib Diakkawn
Best Coach Rohmingliana Khiangte, Bungkawn
Mimal lawmman hian Rs 1,000/- leh Trophy a keng tel.
Quarterfinal aṭangin Player of the match thlan a ni a, trophy pek zel a ni.