Liverpool-in nomawi nen bul an ṭan

English football ngainatute nghahhlelh chu a thleng ta -team ṭha Liverpool leh Manchester City te chu Inrinni zan khan an intawng a, Community Shield inchuha inkhelah hian 3-1 in Liverpool an chak.

Manchester City tan striker thar Erling Haaland-a'n khel tluan ṭhak mah se goal a khung lo a, Borussia Dortmund-a kan hmuh ṭhin striker kha hmuh turin a la awm rih lo.

Liverpool tan erawh Darwin Nunez hmuh turin a awm nghal a, Uruguayan striker hian goal a khung bakah Mohamed Salah penalty goal chu a hlawh chhuak - Reds goal dang hi Trent Alexander-Arnold a khung a ni.

City tan striker thar pahniha rin hlawh lo zawk Julian Alvarez chuan goal a khung nghal a, mahse, Reds an chak tak avangin a goal khungin hriatzui a hlawh lo.

Beisei a sang
Season hmasa Premier League-a team pahnih daidangtu chu point khat chauh a ni a, Jurgen Klopp leh Pep Guardiola enkawl team inel hian English football thawnthu ngaihnawm a belhchhah.

Premier League champion leh FA Cup champion ten season bul ṭan nana an khelh ṭhin Community Shield-in sawihnawm a hlawh ṭhin a, ṭawngkam thiam deuh phei chuan, "Sawi ropui chawp friendly," tih hialin an sawi a, an ngai ropui lo ṭhin.

Mahse, sawi mawi thiam vang ngawtin inelnain a ropui phah lo - Community Shield khel turin English football-a inelna pawimawh pahniha champion team nih a ngai a, a châk apiang khelh ngawt chi a ni lo!

A bik takin tun ṭumah Liverpool leh City an intawn dawn avangin Community Shield-in ngaihven a hlawh a, English club ṭha pahnih hian striker man to an lei ve ve avangin ngaihven a hlawh lehzual.

Chak tum pahnih
Klopp leh Pep inhmachhawn an ni miau a, coach pahnihin player an khelhtir dan aṭangin chak an tum tih a lang - City tan Aymeric Laporte inhliam vangin Nathan Ake a lut tih loh chu Pep-a'n a neih ṭhat ber a thawhchhuahpui.

Tlarhmaah Haaland pawhin bul a ṭan nghal a, midfield-ah Kevin de Bruyne a awm bawk avangin Reds tan hmabak a hautak tih a lang - Pep-a'n Klopp-a hmaah hnehna hlado chham ngei a tum.

Reds an danglam bik lo - Jurgen Klopp-a'n a neih ṭhat ang berin a player-te a luhtir a, hetihrual hian striker man to Darwin Nunez erawh tlangnel nan hun a la mamawh deuha a hriat avangin bench-ah a dah a, Roberto Firmino-a'n bul a ṭan thung.

Hetihlai hian goalkeeper Alisson chu hliam vangin a inlan thei lo a, second choice Caoimhin Kelleher a inhliam ve bawk avangin third choice keeper Adrian-a'n si ban a nghak a, Reds fans an hlauthawng.

Boruak a sang
Inkhel ṭantir aṭangin Liverpool-in an nawr nghal a, minute thumna lekah Salah chuan goal hrulah shot a nei der tawh - Andrew Robertson-a'n chance a nei bawk a, mahse, goal-ah a chantir thei bik lo.

Season hmasa lawkah City-in Liverpool nena inum reng chungin Premier League nomawi an chawi a, City fan-ten hei hi theihnghilh loin, "League-ah in champion teuh hle," tiin Reds an au el.

Liverpool fans an ngawi duh bik lo - vawi ruk an champion tawhna Champions League nomawi la chawi ve lo City fan-te chu, "Khawiah nge in European Cup a awm?" tiin an au let.

Club pahnih hi an dinhmun inthlau avangin hmelma ni ngai lo mah se, tun hnaiah nasa takin City an ṭhang a, Liverpool chu an elpui ber an nih tak avangin club pahnihte inelna a sang chho zel a, boruak a 'hot' lo thei ṭhin lo.

Hei le, Liverpool
King Power Stadium-a fans pahnih in au el thawm ringawt pawh inkhel tinungtu a tling pha a, khelmualah world class player rual an inkhelh bawk avangin football ngainatu tan chuan mit a tlai.

Minute 21-na lekah Liverpool an inlar ta nge nge a, Reds right back Alexander-Arnold chuan European defender 'hot' ber pawl a nih chhan pholangin Salah siamsak chu penalty box pawn aṭangin a thlawh lut a, Ederson tan tih theih a awm lo.

Kum 23 mi Arnold hian a goal khung lawm nan a hmuiah a kut a dah a, Liverpool au el chunga zai vawr City fan-te chu ngawi turin a hriattir - Pep-a leh a naute tan chuan a na khawp ang.

Mahse, City-in tlawm mai an tum bik lo - first half-ah si phurh sut thei lo mah se, Argentine striker Alvarez chuan minute 70-naa buai nuai karah si phurh a rawn sut a, offside phar zet mah se video assistant referee hmanga ennawn a nih hnuah goal-ah pawm a ni.

Nunez-a danglamna
City-in striker thar pahnih an nei a, rin loh zawk Alvarez-a'n goal a khung a, Haaland erawh a khelh ṭhat loh piahlamah goal hmaah a vannei tawk lo - hetihlai hian inkhelh hma hauha sawi hlawh chu Haaland vs Nunez a ni.

Nunez-a'n bul ṭan lo mah se khelmuala a luh hnuah Liverpool an hlauhawm lehzual a, Reds-in number 9 player an neih ngai loh kha an nei ta, tih pholangin goal hmaah a hlauhawm a, Reds-in a tan ball an vawrh lut fo bawk.

Minute 83-naah Nunez hian goal a hlawh chhuak ta nge nge a, James Milner-a siamsak a tauh chu Ruben Dias chuan a kutin a lo dang - referee-in hmu lo mah se VAR hmanga ennawn a ni a, penalty spot a kawk zui.

Penalty pet turin Salah a lo pen chhuak a, Reds tana contract thar ziaktu forward hian harsatna nei loin goal-ah a chantir - Egyptian forward-in goal khung hna a thawk leh ṭan der tawh.

Haaland aiah Nunez
Salah-a'n goal a khungin minute sarih a la awm a, City-in si phurh sut ngei an tum - mahse, Liverpool-in Nunez an nei a, Uruguayan striker hian English football-a a match hmasa berah inthlahrun a tum lo.

Minute sarih zet hun pek belh pawh City mualphona belhchhahna a chantir a, hun pek belh minute linaah Robertson-a ball cross chu a tauh lut a, Liverpool an champion dawn tih a chiang tawh.

Nunez hian Ederson chiah hmachhawn chunga a khung loh kha khung ngat se a hmingṭhatna belhchhahin a awm ngei ang. Haaland-a'n goal a khung lo a, first half-a a shot ṭha zet Adrian-a'n a dante kha a ui khawp ang.

Norwegian striker hian Adrian-a ball dan per chu goal ruakah khungna remchang a nei bawk a, mahse, bar a pet per - Haaland-a'n English football-ah hming chher a duh a nih chuan khatiang ang chance ṭha kha chu hlah loh a fuh ang!

FA Community Shield
Liverpool 3 - 1 Manchester City
LIV: Trent Alexander-Arnold 21'; Mohamed Salah 83' (P); Darwin Nunez 90+4'
MNC: Julian Alvarez 70'

Nunez khan a khel ṭha takzet a, hma pawh a sawn zel ang. Bench aṭanga a luh hnua danglamna a thlen dan kha a ropui a, midang kan luhtir pawh chutiang tho chu an ni. Striker hi chu player danglam bik an ni a, mitinin min tiphur tur an mamawh ang hian striker chuan goal khung an mamawh ṭhin. Darwin khan penalty a hlawhchhuah bakah chance duhawm tak a nei a, goal khung kher lo pawh ni se a hlim khawp ang. Mahse, a tawpna chu mawi takin a khar a, kei pawhin ka lawmpui hle. Goal a khung avangin midang pawhin an lawmpui a, chu chu thil ṭha tak a ni. Kan khelh danah ka lawm a, season a la hma a, kan chak bawk avangin buaina kan tawh thleng khan min tilawm - a chhan chu kan buainate siamṭha tura hun kan neih vang a ni. - Jurgen Klopp, Liverpool manager

Haaland hi player chak ṭha tak a ni a, ṭum dang ang ni se, a chance neih kha goal-ah a chantir em em ang - mahse, hei hi football chu a ni miau si. A chang chuan, "Engtinnge ka tih ang?" tia inenletna tur neih hi a ṭhat chang a awm ṭhin. Haaland-a'n goal a khung loh avangin ka lungngai hran lo a, min la pui dawn tih hi ka hria a ni. - Pep Guardiola, Manchester City manager