Vawiin aṭangin I Day Football Bethlehem Vs Aizawl FC; Venghnuai Vs Chawnpui

Independence Day Celebration Football Tournament hi MFA hnuai inelna kalpui mek zingah chuan a upa ber a ni tawh a, kum 1982 aṭanga ṭan tawh kha niin kumin hi a kum 40-na a ni tawh. MFA buatsaih I Day Football-ah hian Mizoram Premier League club pariatte an inlan dawn a, vawiin aṭangin Lammualah inelna hi khelh ṭan a ni ang a, August 15-ah final khelh a ni ang.

Group A-ah Aizawl FC, Chawnpui FC, FC Bethlehem leh FC Venghnuai te an awm a, group B-ah Electric Veng FC, Chanmari FC, Chhinga Veng FC leh Mizoram Police FC te an awm thung. Vawiin hian group A an inlan dawn a, chhun dar 12:00-ah I League club Aizawl FC leh FC Bethlehem te an inkhel dawn. Chawhnu dar 2:30-ah FC Venghnuai leh Chawnpui FC te an inkhel ang.

Inter Village zunzam
Veng leh veng, khua leh khua, veng leh khua inelna a zo ta a, amaherawhchu All Mizoram Inter Village Football Tournament 2022 zunzam erawh a la cham reng. Aizawl FC inkhel tur hi mi ṭhahnem tak chuan Champhai Kanan champion puitu best player Lalramsanga leh top scorer R. Ramdinthara te vangin an en châk ang.

Ramhlun North semifinal thlenpuitu striker K. Lalrosanga, Republic Veng defender Lalmuanawma (Munez), Hnahthial midfielder K. Lalrinfela bakah tawnhriat nei ṭha sa MS Dawngliana leh Emmanuel HS Zuala te an kawl tih hriat a ṭha a, team hmuhnawm an ni dawn.

Chutihrualin hriat tel atana ṭha chu MPL club-ten foreigner an lalut dawn lo a, Aizawl FC danglamna ṭhin pakhat a bo dawn. Club thar FC Bethlehem leh I League club inkar a zim sawt dawn tihna a ni a, tawnhriat nei ṭha coach Victor Lalbiakmawia'n a enkawl dawn avangin an tawh a khirh ang. FCB coach Victor hi AFC B License holder a ni a, NIS chhuak a ni bakah a inkhelh laiin Services striker ṭha a ni a, Services hi a enkawl tawh bawk.

FC Bethlehem hian player pawh an nei pangngai a, tawnrhiat nei player Hmingthanmawia, Lalrammawia leh Lalmawizuala ten an ho thei dawn a, player chhuak thar zinga duhawm ber zinga mi Moses Lalrinzuala, Lalnunzira, F. Lallawmkima leh Lalrintluanga te an awm. Aizawl FC an hlauh bik ring suh.

Chawnpui Vs Venghnuai
Chawnpui hi Mizo coach ṭha Lalsangzuala Hmar-in a enkawl dawn a, an ṭha dawn tih a chiang nghal. Sanga chhawr theih turin tawnhriat nei ṭha Lalrinchhana Tochhawng, David Lalrinmuana leh Samuel Laltlanthanga te bakah Champhai Kanan champion puitu forward ṭha Laltlanzova (Zozoa) bakah Lalsawmzela, David Laltlansanga (Avid-a) leh Ephraim Vanlalduhsaka te an awm a, an inkhel en a châkawm takzet.

FC Venghnuai hi coach Lalrindika Hmar-in a enkawl dawn a, Rindika Hmar hian kumin MPL Under 18-ah FC Venghnuai a champion pui avangin inrintawkna a ngah sawt dawn a, player hriat chian sa ṭhahnem tak a chhawr nawn thei dawn bawk. FC Venghnuai hian player hmuhnawm Hualngohmun striker Vanlalthanga an chelh thei a, India junior team tana khel thei midfielder Eric Remruatpuia Chhangte bakah Chanmari FC midfielder Lalruatfela (RF-a) te an la thei a, Chawnpui nen an inbuk tawk viau tura ngaih a ni.

I Day Football 2022
Group inṭhen dan
Group A : Aizawl FC, Chawnpui FC, FC Bethlehem, FC Venghnuai
Group B : Electric Veng FC, Chanmari FC, Chhinga Veng FC, Mizoram Police FC

Fixtures
Group Stage
Lammual - Vawiin Inkhel Tur
FC Bethlehem 12:00 Noon Aizawl FC
FC Venghnuai 2:30 PM Chawnpui FC

Lammual - August 2, Thawhlehni
Chanmari FC 12:00 Noon Electric Veng FC
Chhinga Veng FC 2:30 PM Mizoram Police FC