Armed Veng South an hrem

Mizoram Football Association Disciplinary Committee-in LBS Suzuki All Mizoram Inter Village Football Tournament-a thil thleng hrang hrang an enlet a, July 30 khan hremna an ti chhuak. Armed Veng South chu anmahni ṭantuten Lammual hmunhma nasa taka an suasam avangin MFA leh a hnuaia DFA buatsaih inelna ṭum hnih khel thei lo turin an hrem.

Ṭum hnih hrem tih hian a rei zawng a sawi lo a, inelna buatsaih danin kawng ro thui tak a hril thei ang. Aizawl DFA-in veng leh veng inelna NECS Cup buatsaih an tum a, hei hi AVS hremna hmasa ni tura ngaih a ni. Kum 2023-ah Central YMA-in MFA nen ṭangkawpin CYMA Football an buatsaih a nih chuan hrem an nih leh bawk ang. Chutihrualin MFA leh Aizawl DFA ten inelna an buatsaih lawk lo a nih chuan hremna hian hun rei zawk a awh a thei dawn tihna a ni.

AVS bakah hian player chemawi lote an hrem bawk. Dinthar leh Kolasib Ṭumpui VC inkhelh ṭuma MFA Official kut thlaktu Dinthar LC team player Isaac Rosangliana chu MFA leh a hnuaia DFA buatsaih match thum khel thei turin an hrem.

AVS leh Ramhlun North inkhelh ṭuma che mawi lo, Laldinliana leh Lalnunsanga te pawh match thum tho khel thei lo turin an hrem. Inkhelh bana mawi lo taka match official laka che R. Malsawmkima pawh match hnih khelh thei lo turin an hrem bawk.

ISL player Laldinliana chuan a tihsual a pawm a, MFA hnenah thupha chawina lehkha a thehlut nghal a, tun hnua ti tawh lo tura a intiamna chu MFA Disciplinary Committee-in an thuchhuah siamah lawmawm an tih thu an tarlang.