Mane-a'n goal a khung; nomawi a chawi

Germany-ah Sadio Mane-a'n insiamrem turin hun a mamawh rei lo - Bayern Munich tana competitive match a khelh hmasak berah goal a khung nghal a, DFL Super Cup-ah a champion pui.

German Super Cup-ah hian goal riat zet a lut a, Bayern hian RB Leipzig chu 5-3 in an hneh - Bundesliga champion Bayern tana goal khungtu zingah Mane a tel a, German football-a a match hmasa berah nomawi a chawi nghal.

Bayern tan hian Jamal Musiala, Mane, Benjamin Pavard, Serge Gnabry leh Leroy Sane ten goal khat ṭheuh an khung a, Leipzig tana Marcel Halsterberg, Christopher Nkunku (penalty) leh Dani Olmo goal khungin awmzia a nei lo.

German champion Bayern hian an goal khung khawl Robert Lewandowski chu nipui transfer-ah khan Barcelona lakah an chân a, mahse, Polish striker tel lo pawhin goal khung an harsat lo tih an pholang.

Lewy a ngai lo!
Bayern-in ui tak chungin Lewy an thlah a, Polish striker hian Barcelona tana khelh a duh miau avangin German champion hian an player chhuanvawr hi an chelh thei lo a, ui tak chungin an hralh.

Mahse, Julian Nagelsmann-a enkawl team hian Lewy thlakna tel loin Polish striker hi mawlmang takin an hralh ngawt lo - Liverpool aṭangin Sadio Mane an lei sa a, an match hmasa berah an tisual lo tih a lang nghal.

Bayern boss Nagelsmann-a'n 4-2-3-1 formation hmangin, Liverpool-a mual sir lama a hun tam zawk hmang ṭhin Mane hi tlarhmaah a dah a, amah thlawp turin Musiala, Thomas Muller leh Gnabry an awm a, ngaihtuahawm lo tak an ni!

Die Roten (Bayern sawina) hian minute 14-na aṭangin goal an khung ṭan a, corner aṭanga ball kal chu Leipzig defender-ten an clear ṭha tawk lo a, hei hi Musiala chuan remchangah lain goal hmahruai a khung.

A hming Mane
Goal an chhuah hnuah Leipzig an insiamṭha a, mahse, Nkunku hmanga si phurh chhangleta an inngaih chu offside vangin pawmsak an ni lo a, pound maktaduai 35 man Mane a rawn lang zui.

Germany midfielder Musiala chuan Gnabry tan ball a pe a, Arsenal forward hlui hian ṭha zeta a lakluh hnuah Mane tan a siamsak - Liverpool forward hlui tan goal-a chantir turin harsatna a awm lo a, minute 31-naah an goal hnihna a khung.

Mane hian pre-season nena chhiar telin, Bayern a pan hnuah match hnih a khel tawh a, a match khelhah goal a la khung ve ve - German champion-in Senegalese forward an lalut an tihsual lohzia an hmu chho zel.

Bayern an phur laklawh a, chawlh an tum lo. Khel ṭha em em mai Musiala bawk a inlar a, France defender Pavard tana ball duhthusam a pek chu Pavard hian goal-ah a lo chantir a, chawlhlawk an hmanin Bayern hian 3-0 in hma an hruai der.

Beiseina thamral
Second half-ah Leipzig an insiamṭha a, substitute André Silva-a'n bar a tih per hnuah goal an khung ve ta nge nge - corner aṭanga ball kal chu Halsterberg chuan a tauh lut a, Bayern keeper Manuel Neuer-a'n tih ngaihna a hre lo.

German Cup champion Leipzig phur chhung erawh a rei lo hle - si phurh sut zo tura goal hnih khung belh mamawh team hian an chhuah belh zawk a, goalkeeper Péter Gulácsi chuan Muller-a pet chu ṭha zetin dang mah se a per lehlam chu Gnabry chuan chiang zetin a khung a, 4-1 a ni.

Mahse, Leipzig an beidawng duh chuang lo - Pavard-a'n Olmo a tih tluk avanga penalty a chawi chu, Nkunku chuan goal-ah a chantir a, Spanish winger Olmo hian khung ve zuiin 4-3 a ni hman.

Leipzig-in comeback ropui an lantir dawn emaw tih mai a awl hman viau. Mahse, hun harsaah team ṭha Bayern an ṭang tlang a, hun pek belh minute riatnaah counter attack aṭanga ball kal chu Sane chuan goal-ah a chantir a, a zawna a vawi thum nan Bayern-in German Super Cup-ah nomawi an chawi.

German Super Cup
RB Leipzig 3 - 5 Bayern Munich
RBL: Marcel Halsterberg 39'; Christopher Nkunku 77' (P); Dani Olmo 89'
BAY: Jamal Musiala 14'; Sadio Mane 31'; Benjamin Pavard 45'; Serge Gnabry 65'; Leroy Sane 90+8'