Jesus-a ke a hmui chhunzawm

Arsenal striker thar Gabriel Jesus-a'n season thar inbuatsaihna a hmang ṭha hle. Inrinni zan Emirates Cup-ah hattrick siamin a team hi Sevilla lakah 6-0 in hnehna a chanpui - tun kar tawp aṭanga khelh tur Premier League a nghakhlel tawh khawp ang.

Gunners tan hian Jesus bakah hian Bukayo Saka-a'n goal hnih a khung a, striker Eddie Nketiah chuan hun tawp dawnah an goal rukna a khung ve bawk, goal an khung hnem bakah an lamah a luh loh avangin Mikel Arteta naute tan result ṭha bik a ni.

Pound maktaduai 45 man Jesus-a'n pre season chhungin goal sarih a khung a, lawmna tur a ni. Amaherawhchu heng goal a khungte hian Arsenal hi point a la hmuh pui lem lo, inelna takah a theihna chu fiah tur a ni ang.

Captain nghet atana ruat thar Martin Odegaard-a'n mual chhungah a hna a hlen ṭha a, inkhel khaikhawmtu pawimawh a nih bakah goal nawr kawngah a ṭangkai zual - Norway international hi kum 23 mi lek la ni mah se ram leh club tan captain nghet a ni der tawh.

Premier League season tharah Arsenal hian match hmasa ber an khel dawn. August 5, Zirtawpni zan laiah Crystal Palace an lenchilh dawn a ni.